O se nofoaga na amata i le na o ni moomooga, sosoo ai le nofo tatali i fuafuaga ua faataatitia, mo le mamalu o le atunuu i lea faaitu o Aukilani i Saute mai Magele agai i Otahuhu, ae o lea ua iu ina tino atoatoa mai lenei moomooga, ina ua tatala aloaia i le aso 8 o le masina talu ai, Aukuso, lenei nofoaga tutotonu, le TOIA Recreational Centre.
E tusa ma le $30.9miliona le tau atoa o lenei galuega tele. O se nofoaga e mautinoa o le a feiloai ma potopoto faatasi ai tagata o le komiuniti, ma atili maua ai sootaga mafanafana ma le fiafia o tagata uma o le a aogā i ai vaega uma o le auaunaga a lenei nofoaga.
E leai ni matua faatulaga o soifua o i latou o le a mafai ona faaaogāina vaega eseese o auaunaga i lenei nofoga; e maua mea uma mo le faamalieina o soo se vaega o manaoga o soo se tagata, o nofoaga e fai ai faamalositino, o nofoaga suesue ma faia ai sailiiliga faaleaoaoga, ae maua foi vaitaele mo auauga poo isi faamalositino.
O le susuga i le faafeagiga ia Rev Ata Milo o ekalesia EFKS Otahuhu sa saunia se tatalo ma ni upu faalaeiau i le sauniga aloaia na tatalaina ai lenei nofoaga mataina auā meafai a le komiuniti. O le sui faufautua, susuga Alf Filipaina na avea ma MC mo le tatalaina o le nofoaga.
Ma sa auai foi le toatele o tamalii o le atunuu o loo mautulaga i le atunuu, e pei o le afioga i le alii Faipule, MP Su‘a William Sio, Manukau Ward Councillors Anae Arthur Anae & Alf Filipaina, Mangere-Otahuhu Local Board Members Lemauga Lydia Sosene, Leau Peter Skelton, Tafafunai Tasi Lauese ma le susuga Nick Bakulich.
