E foliga mai ua amata ona tau tulei ese e le malo le matagaluega o le PEC (Pacific Education Centre) mai i ana tupe faasoasoa i tausaga taitasi, pe a fua i ai i tupe e masani ona maua i lea tausaga ma lea tausaga, lea sa masani ona oo atu i luga i le $900,000 tala poo le 80% o le maketi e tuuina i ai e le malo.
Peitai ua faateia nisi o sui a faipule o le Pasefika ina ua faatulai mai se mataupu e uiga i le Pacific Education Centre, ma lana tupe maua i lenei tausaga e oo atu i le tausaga fou 2016 ua na o le $30,000 o le a foaiina e le malo i lea matagaluega. O lona uiga ua na o le 5% o le a maua. Ma e fesiligia ai i lea lagona le ono faaauau pea o le Pacific Education Centre ma le tapunia loa i se taimi. Ae o le tāua o lea matagaluega i tagata Pasifika, o le aseta lea mo tagata Pasefika o loo mafai ai ona aoaoina le Gagana Samoa faatasi ai ma gagana a isi atunuu o le Pasefika.
O le masani sa iai lenei matagaluega, sa filifili mai e le Minisita ona sui i le komiti faafoe (board) ae o le mea ua tupu ua faatalatalanoa e le malo le komiti faafoe o lenei matagaluega i le masina o Me ma faailoa i ai ua na o le $30,000 le tupe o le a maua mo le tausaga fou.
Ae sa fesiligia e le afioga i le faipule o le itumalo o Magele le Tofa Su‘a William Sio poo le ā lea mea ua latou faia, auā o lea ua foliga mai ua lē gagana ai le Minisita o Aoga ma le Minisita o Tagata Atumotu o le Pasifika le afioga ia Peseta Sam Lotu Iiga. Sa fesiligia foi e le faipule le Minisita pe tāua ia te ia tagata atumotu pe tāua ia te ia le tatou gagana, ae o lea o le a fetagofi e faaleagaina le matagaluega lea e nafa ma le aoaoina o gagana a le atunuu.
Ma na faaalia e le faipule e oo mai i le taimi nei e lei mafai lava ona taliina lea fesili o lo faaauau pea le gūgū o Minisita, ma e foliga mai o lea ua ioe i ai e talepe le matagaluega o le Pacific Education Centre.
