Ua lē o toe mamao ona faia lea o nisi suiga i foliga o tupe a le atunuu, e pei ona ta‘ua i se lipoti mai le nusipepa a le malo, le Savali. O suiga ia o le a lē toe vaaia ai tamai tupe siliva e pei o le 1 sene, 2 sene & 5 sene.
O le a tumau pea ona iai tupe siliva o le 10 sene, 20 sene & 50 sene, peitai o le a faalaiti ifo le tetelē ma suia foi le ituaiga o uamea (metal) e gaosi mai ai.
E tumau pea isi tupe pepa e pei ona iai i le taimi nei, se‘i vaganā le $2 tala lea o le a lē toe iai i le tupe pepa ae o le a faaaogā se tupe siliva lanu auro.
O nei suiga e pei ona faamaonia e le pule o auaunaga nei tau tupe a le malo, (Banking and Corporate Services), Malaeoalii Sootala Pua, e amata faamamalu a o lei oo i le iuga o le tausaga.
O le suiga ina ia lē toe faaaogāina tamai tupe siliva, o se fuafuaga ua leva ona tatau ona fai e pei ona saunoa i ai le alii pule.
‘Ua fai si taugata o le toe gaosia o tupe siliva tuai nei, aemaise foi ua tele tausaga e lē o toe iai se manaoga tele mo nei tupe. O le toatele o le au faioloa, ua tele ina faaatoa lava i tālā tau o a latou oloa e aunoa ma le toe faatautau ai o ni sene e pei o le tasi sene, lua sene pe lima sene foi.’
E foliga o le suiga foi lea ua iai i le tele o isi atunuu, aemaise lava ona ua siisii pea i luga le taugata o le toe gaosia o tamai tupe siliva nei. Lea foi la ua maua mai ai e Samoa lea fuafuaga e faatulaga i ai le gaosiga o ana tupe.
E pei ona silafia, o tupe o loo iai i le taimi nei, o loo lomia ai le ata o le Ao o le Malo ua tuanai atu, le Susuga Malietoa Tanumafili II, peitai o lea ua fuafua le CBS o le a suia ata i na tupe siliva fou, i le ata o le afioga i le Ao o le Malo o loo iai i le taimi nei, le Afioga Tui Atua Tupua Tamasese Efi.
Talu ai o lea foi ua lē toe faatulagaina lena tofiga mo le umi e soifua ai le Ao o le Malo, lona uiga o le a ta‘i lima lava tausaga ma toe sui le ata i nei tupe siliva, e fua lava i lē o le a seei i le tofiga Ao o le Malo i lena taimi.
