Ua taunuu manaoga le au faifaatoaga o le atunuu mo se maketi sili atu ona tele, ma lelei, ae maualuga lona tulaga ina ia lē toe aafia a latou faaeleeleaga i le taimi o lologa pe a tetele timuga ma faaletonu ai nofoaga maualalalo o le taulaga o Apia.
O lea ua molimauina nei e le atunuu le mae‘a ona fausia ma ua ato le maketi i Fugalei. Sa pisi ai masini mamafa i le vaiaso ua mavae i le faamafolafolaina faagatasi o lona faataamilosaga i fafo, ina ia maua le laugatasi manaomia.
O le masina o Setema sa faailoa muamua o le a faatoa mae‘a ma tatala ai le maketi, peitai o foliga ua iai nei lea galuega e ono tatala ai i se taimi o le masina nei, ma taunuu ai manaoga o le Malo ia tatala ma faaaogā a o lei oo mai le taimi e usuia ai le fono a atunuu tau atiae o le lalolagi i le masina o Setema.
O vaaiga ua iai nei le maketi fou, e fua i le maketi sa iai muamua ua tala i lalo e mautinoa ai e lē o toe iai ni faleoloa laiti e toe siomia ai le maketi. O lona uiga o le a na o fua o faatoaga e faatau ai, ma nisi ituaiga o pisinisi laiti e lē o mautinoa i le taimi nei.
Pe a fua atu i le maualuga tele o le faavae o le maketi ua iai nei, e manino ai o le a lē toe iai ni popolega ma ni atugaluga o i latou o le a faaaogāina pe a oo i lologa ma tafega auā o le nofoaga i Fugalei o loo iai le maketi e maualalo tele ma e faigofie ona oo i ai lologa pe a tatafe ma tutumu alavai o loo i le taulaga.
Faaalia e se ofisa sinia o le Faalapotopotoga o Taui o Faalavelave Faafuasei o loo iai le pulega o le maketi i Fugalei, e toatele le atunuu ua oo atu talosaga i le fia maua o ni avanoa e faaaogā ai le maketi ia latou poloka auā le faatauina o fua o faatoaga.
Na musu le ofisa sinia e faailoa mai poo ā isi pisinisi o le a faaaogā i ai poloka o le maketi pe afai e faofale uma le au faifaatoaga i poloka ua fuafua latou te faaaogā.
E sefulu miliona le tau o le galuega ma o se konekarate faufale mai Saina e ta‘ua o le Qingdao na nafa ma le galuega. Na fai ma to‘a le galuega ona o le tuai mai o uta o oloa sa oka mai Saina aemaise na ta‘ua, sa tuai foi ona o le faigata o le itu i le gagana (faaperetania) sa fesootai ai i le konekarate mai Saina sa faia le galuega.
O se galuega na tele i ai tala ma lipoti salalau ona o le uma o le taimi na tuu e mae‘a ai, ae toso ai lava ona sa iai nisi fetuunaiga i fuafuaga a le Malo. Na atili tele foi lipoti a nusipepa i le galuega ona o le umi o se taimi o timuia ma faalalā le au faifaatoaga, i maketi lē tumau sa faasee i ai ona o le tuai o le fausia o le maketi fou.
O le alagaupu a le atunuu, e tetele lava a pesega ae matua i le oo. O lea ua tele tala ma lipoti ae ua taunuu ina mae‘a le galuega ma o le a faaaogā e le atunuu.
