E ui ina ua taoto ai i le faamasinoga le mataupu sa vesia ai le lotoifale o le itupa Samoa o le Ekalesia PIPC i Avondale, peitai e iai lava itu e tāua ai ma aogā, le tulai mai pea o ituaiga faafitauli faapea, aemaise lava i totonu o ekalesia ma lotu.
O le faafitauli tele o loo ua aliali mai, ona ua vaeluaina le tofa ma le faautaga loloto, a tamalii ma failauga o le atunuu, sa tautua ma auauna i le Palisi lea i Avondale. O le faafitauli, ona e foliga e iai ni vaega o se maliliega sa osia ma papalagi, e faapea sa lē tausisia, ma ua oo ai ina poloaina faamalosi e le Perepereane papalagi le mamalu o le itupa Samoa, ina ia tuua loa le malumalu.
Ua nonofo pea nisi i lalo o le faamalu o le Perepereane, e oo mai i le taimi nei, a o le isi vaega, ua tuumuli ese, ona e matuā teena lea faiga faamalosi, ma e iai mafuaaga tatau, o le a finauina i le faamasinoga.
E tusa ai ma nisi o faamatalaga faaletulafono, e pei foi ona lomia atu i le vaiaso talu ai i le Samoa Times, o loo iai se faaletonu i nai vaega ninii o upu ma faaupuga i totonu o le faavae o loo tausisia pea e papalagi, peitai o loo ama i ai le silasila a le itupa Samoa.
E ui ina lē fia faia mai i ai se faamatalaga a nisi o auauna a le Atua sa fesiligia e le tusitala i lea lava mataupu, ae lē gata ai le taumafai pea, ina ia tusia ma lipotia vaega tāua o loo fia manino i ai le toatele o tagata.
O le faamoemoe maualuga, o le lipotia o vaega ogaoga faapea i totonu o ekalesia, o se isi lea o luitau tele, e ao ona silasila mamao i ai le tele o isi foi ekalesia, aemaise lava pe afai o faia ni maliliega ma palagi, ia poo nisi foi itu.
O loo olaola pea se tasi o muagagana e faapea, e tele ni aoaoga e maua mai i se mea sese, peitai e lē o tusilima le Samoa Times, poo ai e sese, a o ai e sa‘o. E lē o se taimi muamua lenei ua tulai mai se faafitauli faapea, i le va o taitai papalagi o le Ekalesia Perepereane Aoao, ma tagata lotu Samoa.
E iai foi nisi mataupu faapea, sa tulai mai i tausaga ua mavae, ma o le tasi lea o faamaoniga o le manatu, e lē o se taimi muamua lea ua tulai mai ai lea ituaiga faafitauli. Sa oo i le faamasinoga ma faia le faaiuga, atonu o loo malamalama lelei i ai le toatele i le faaiuga na oo i ai lea foi faamasinoga tele a le ekalesia Perepereane, i le va o Palagi ma Samoa.
Ua lē gata i le feteenai ai o finagalo o tagata lotu, ae o le mea moni, ua aafia ai ma le Aufaigaluega a le Atua, o loo galulue ma taulogologo le finagalo o le Atua, ina ia fafaga ai le soifua faaleagaga o tagata lotu.
O le mea moni a oo ina oia le faavae, ma silisili foi le faamaoni ma le sailia o le amiotonu, ona ulufale loa lea i le tatau ona lua itu mo le faia o se finauga. O le tulaga moni lea ua iai, le mataupu a le Palisi a Avondale.
Ua fesiligia nei i manatu ma finagalo o le toatele o tagata Samoa i Aukilani ma Niu Sila atoa, ae lē taumate e faapea foi le mamalu o le atunuu i Samoa. Pe o fea a tua i ai le finauga ua amata nei, a o ai o lea fai ma ia meatotino a le ekalesia? E mafua ona tulituliloa i finagalo o tagata Samoa le mataupu a Avondale, ona talu ai o se tasi lenei o ekalesia sa tele sona sao i faamoemoega o tagata Samoa, mai Samoa, faapea foi i latou o loo alala ma papaao i Aukilani ma Niu Sila atoa.
E lē gata i lona malumalu tapuai sa faaaogā tele i sauniga ma isi faamoemoega tāua o le atunuu, ae sili ai le auaunaga i le hall i Nafanua. O le Nafanua Hall, e toeitiiti a lē malolo lona faaaogāina i fuafuaga ma faatatauga a tagata Samoa ma le Pasefika. O Po Siva, Tusiga Igoa, o malaga mai Samoa, o ‘aiga o faaipoipoga ma maliu, o aso fanau, o polokalame faaleaoaoga e oo lava i fonotaga a afioaga ma faalapotopotoga, o le Nafanua Hall lava sa agai i ai ma faaaogāina. E oo lava foi i polokalame a le malo ma Matagaluega, sa tatala ma faaavanoaina i ai lea nofoaga.
Ua tele nofoaga faapea a ekalesia, peitai e fou ma e lei leva ona tautuaina tagata lautele, a o le Nafanua Hall i Avondale, ua silia ma le 30 tausaga o lana auaunaga. I le ma le isi itu tāua, afai sa valaauina tagata lautele i lona faatoa tatalaina, o lona uiga sa iai foi la sina sao itiiti i le tulaga tau seleni e pei o tu ma aga o faamoemoega faapea.
E lē toe faitauina le tāua o foai sa faia, peitai ua mafai ona iai le aiā tatau a tagata lautele, e fia iloa ai ma fia silafia, taualumaga o lenei mataupu. O le moni, ua oia ma e aafia lava meatotino i se faaiuga ma le taunuuga o le faamasinoga. O le a iai nisi o le a selesele ma le fiafia, a o nisi foi o le a inu i se vai oona, mai itu e lua o le faamasinoga ma le finauga o le a faia.
O ai le Perepereane?
O se pepa o faamatalaga sa tuuina mai i le Samoa Times, o loo vaevaeina mai ai vaega uma ma aafiaga, ua faailoa ai le tele o faiga faaalatua (corruption), i totonu o le Ekalesia Aoao a le Perepereane (Prersbyterian Church).
O vaega nei sa faatino ai le tautua a Avondale mo le Perepereane, ma ua foliga mai ua lē amanaia ma ua tia‘i faafasifa‘i e le itupa palagi.
1. O loo ta‘ua e faapea, o le tausaga e 1960, sa tuufaatasi ai le PIPC, Pacific Island Presbyterian Church, ma le tino o le PCANZ Presbyterian Church of Aotearoa New Zealand. E mai lea lava tausaga, sa avea ai Avondale PIPC, o se tasi o itutino o le Perepereane Aoao i Aotearoa. O le avea ai ma itutino o le Perepereane, sa faapea foi ona lafo tupe ma fesoasoani i le tulaga tau seleni, mo le atinaeina o le galuega, aemaise le fausia o le malumalu tapuai.
2. Ua avea i matou ma taitai e pei o ni tagata sauaina, i le faia o tulafono ma taiala o le ekalesia. Ona talu ai ua taofia ma ua leai se avanoa e faaleo ai ni o matou lagona ma so matou leo, i le faaupuina o tulafono i taitaiga a Loia Papalagi, o le ekalesia.
3. O nisi o ofisa o le Perepereane, sa latou taitai sese le faalapotopotoga, ina ia faia faaiuga i faigapalota, ia tau mataupu tāua, e aunoa ma se tulafono i totonu o le tusi o taiala, mo i matou (Avondale), ina ia palota.
4. I le itupa Samoa lava ia, e tauala i se taumafaiga a le matou Loia, ua faigata tele ona taumafai e faia se finauga agai le Perepereane, ina suia o latou manatu, ona o ni mea sese, sa latou tauavaeina, ua mafua ai fevaevaeaiga ma le vaeluaina o tagata lotu. Ua faataliga tuli pea le Perepereane, ma ua lē fia faalogo mai i se matou tala, ua latou faatupeina ai se Loia, e poloaina i matou ina ia faia i le matou faitalia se auala e manaomia.
5. O loo tumau pea, o i matou o sui ma tagata o le Perepereane, e tusa lava poo ā faafitauli ua oo i ai i lenei taimi. E tusa foi poo ua vaeluaina le itupa Samoa, o matou lava e tasi, ae ona o le aiāina e papalagi ua mafua ai fevaevaeaiga. O le taimi nei ua totogi e le Perepereane Loia, ina ia finauina le faatumauina pea o a latou mea sese sa faia, atoa ai ma le faasagatau mai ia i matou. O loo teena foi e le Perepereane la matou talosaga ina ia fesoasoani mai i le tau o a matou sailiga faaletulafono.
6. O le faaauau ai pea ona teena i matou mai le sailia o se fesoasoani faaletulafono, ina ia faamanino ai faiga piopio, ma mea sese i totonu o le ekalesia, ua tapa e le Perepereane la latou Loia, e talosagaina se poloaiga mai le Faamasinoga Maualuga, e taofia uma ai teugatupe o loo iai a le lotu.
7. O se fesili o loo tulai mai i le matou vaai, pe aisea ua lē mafai ai e le Perepereane, ona faia se faatoesega i la latou mea sese ua fai, ma totogi le tau o le faamasinoga mo itu e lua, auā o matou uma o sui o le Perepereane.
E iai le talitonuga o gaioiga uma o loo faia e le Perepereane i le taimi nei, o le faaaogāina faapito tasi o tupe a le lotu sa matou tigaina ai e lafo, sa fai i ai o matou saofaga, ua lē talafeagai. Afai ua faaaogā e totogi ai le tulafono a le isi itu, e tatau foi ona faia faapea i lenei itu, peitai ua lē o lea le faamoemoe, ua taofi lenei itu ona toe tagofia seleni ma teugatupe uma a le lotu, se‘i vaganā ai i latou lava.
O le malumalu tapuai, o le hall a Nafanua, ma le aoga faataitai ma nisi o meatotnio uma a le PIPC a Avondale, ua oia ma ua tulaga fesiligia nei, Poo ai e ona, o ai foi o le a pulea.
O le tali o lea fesili, o le a faatalia nei mo se taimi umi, pe afai o le a faaauau pea ona fai se finauga i luma o le faamasinoga.
Sa taumafai e fesootai i nisi o le mamalu o tamalii ma failauga o le atunuu, o loo nonofo pea ma o loo faaauau pea ona faaaogāina aseta i le taimi nei, peitai e lei manuia. O nisi foi sa lē fia faia se faamatalaga, ona e faapea ua taofia uma ni faamatalaga i lea mataupu, ona ua i lima o Loia, ma le faamasinoga.
O le a se‘i saili pea se finagalo o lea foi itu, ina ia aumai foi so latou lagona i vaega taitasi uma e pei ona faamatuu mai e le isi vaega o le ekalesia.
