Ua faaauau finauga a le Peresetene o le Asosi o Taulasea a Samoa ua iai i le taimi lenei ma lē sa avea ma Sui Peresetene o le Asosi, ona o le laga e sui o le laulauafono fou a le Asosi o i latou e pule i le lesitala ma le laisene ua faaauau ona faatautaia ai galuega a le alii sa tofia o le Sui Peresetene.
O le tali mai lea a le peresetene o le Asosi o taulasea, Moli To‘ala i tuua‘iga a lē sa avea ma sui peresetene o le Asosi, Ietitaia Tautaioleua Tapumanaia. “Ua ‘ai laulu le Asosi o taulasea i faaupuga a Ieti, ma e lē o ni tamaiti lea e fai agai i ai ana folafolaga ma saunoaga,” o se saunoaga lea a le tamaitai peresetene.
O le pepa faamaonia ma le tusipasi faataulasea o le alii o Ietitaia Tautaioleua Tapumanaia, lea sa faapea mai le Asosi o Taulasea e tatau ona toe faafoi atu, ona o meatotino ia a le Asosi.
Sa ta‘ua foi e le peresetene o le Asosi, Moli To‘ala o meatotino ia e manaomia le toe faafoi atu ona o loo faaaogā e lea alii i ana galuega i tua i lona aiga, ae o loo iai le popolega ina ne‘i tulai mai se faalavelave i gasegase o loo ia togafitia, ona tuua‘ia lea o le Asosi.
Faaalia e Ieti, e leai se aiā a le Asosi i ia meatotino ona e patino ia te ia ma na te lē o toe faaaogāina foi i le taimi nei.
“O a‘u lava tupe na maua ai lo‘u tusipasi ma lo‘u pepa faamaonia, e lei alu ai se seleni a le Asosi o taulasea,” o le tali mai lea a Ieti.
Na ia ta‘ua foi, e tuu atu pea i le Asosi pe oo atu e toe aumai ia meatotino ae e tatau ona silafia e le Asosi, e iai lana aiā tatau e umia ai ia meatotino.
Faaalia e le peresetene, e moni o ia meatotino ua tuu atu i le taulasea, ae o le laisene a le Asosi mo le faatautaia o galuega i lalo o le tulafono, na ala ai ona maua pepa faamaonia faatasi ai ma tusipasi.
Ta‘ua foi e Moli, e lē na o Ieti o loo agai i ai le faaseā a le Asosi, o loo aofia ai foi ma nisi o taulasea ua lē toe auai atu i le faagasologa o galuega a le Asosi i le ofisa o loo faia uma ai galuega faataulasea.
Ua iai nei le fuafuaga, o le aso mulimuli o le masina nei, o le a fono ai le Asosi ma tagatagai ai loa i le mataupu mo i latou e lē o toe i lalo o le Asosi ina ia ao mai meatotino o pepa faamaonia ma tusipasi o loo latou faaaogāina faasolitulafono.
“Afai ua fai le galuega a le tagata ia i lona aiga, e tatau la ona toe aumai meatotino a le Asosi ae agai sa‘o le tagata ia e totogi lana laisene mo le tausaga auā le faatinoina o ana fofo i tua,” o se faamatalaga lea a le peresetene.
O le mataupu lenei ua laga i le va o taulasea Samoa na amata mai ina ua faalauiloa i le vaiaso na tea nei e le Asosi fou o Taulasea Samoa ua tofia nei, ua sui atoa le latou laulauafono, ua mafua ona ua faamavae le Peresetene sa iai muamua ma ua te‘i lava ua lē toe agai atu le Sui Peresetene ia Ietitaia Tapumanaia.
Ua faamautu la le laulauafono fou ma o se tasi lea o mataupu ua tagai i ai, o le faamalosia lea o laisene ma lesitala o sui i totonu o le asosi lenei.
O le amataga talu ona faavae mai lenei asosi e to‘a 52 na lesitala ma umia laisene ae o le taimi lenei e toe to‘a 25 o totoe i totonu o le faalapotopotoga.
Faaalia e Tapumanaia e tele mafuaaga o le lē toe fia foi i le Asosi. “O le mafuaaga muamua lava ua ou lē toe fia auai ai i totonu o le Asosi, ua lē fetaui le tulaga o le auaunaga o loo fai i le taimi nei, i le faasologa o aso ua vaevae i ai taulasea,” o se faamatalaga lea a Tapumanaia.
“E tatau lava ona alu sa‘o le ma‘i e agai atu i le taulasea e ona le ma‘i ae lē o le faasolosolo i taulasea e tofi mai mo le aso”.
O le faiga o loo iai le faasologa o tiute o le Asosi, e $50 tala e resitala ai le ma‘i ona ave lea o le $30 tala mo le taulasea e fofo ai le ma‘i ae $20 tala e mo le Asosi. Faaalia foi e le alii sa i le tofi sui Peresetene, e alu ese ma le Asosi, e lei iai lava se faamalamalamaga o le tusitupe, ma pau le tala na faato‘ā iloa mulimuli ane, o le $150 tala sa totoe i le tusitupe lea sa tala e faaaoga e le peresetene lea ua faamavae mai le Asosi, le susuga ia Vaitogi Isaraelu Seumanutafa ae na o le failautusi foi na faailoa atu i ai.
Pau le itu na fesiligia ai e Tapumanaia o le Asosi o taulasea o loo iai i le taimi nei, o le mafuaaga na maua ai lona tusipasi ona na ia ta‘ua o lona lava afu ma ana tupe sa totogi mo lana resitala lea na faauu ai ma maua lona tusipasi faataulasea ma lona pepa faamaonia e avea ai o ia ma taulasea.
Faaalia e le failautusi o le Asosi, Saumalu Saufoi, e $250 a le taulasea na totogi mo le laisene mo le faatinoga o le galuega ma o loo i ai i faamaumauga, e lei totogia lea laisene e Ieti. “O tuua‘iga foi e faatatau i le tusitupe, na mae‘a atu lava tofi o i latou na tulai muamua mai i le laulau a le Asosi ma leai atu ai lava ma se tupe, ma o le taimi nei lea faato‘ā toe amata lelei ma faaauau le tusitupe e sui o loo iai pea i totonu o le Asosi,” o se faamatalaga lea a le tamaitai failautusi.
O loo faaauau ona faamautu le Asosi i lo latou nofoaga i tua ane o le Ofisa o Tagata tafafao maimoa mai fafo ma na ta‘ua e le peresetene, Moli To‘ala o loo gasolo lelei pea a latou fuafuaga i le taimi nei ma ua fuafua foi e tatala se isi ofisa i Salelologa mo taulasea o loo i le motu tele i Salafai.
