O le taugata ma le faigata o tusi talosaga e lisi ai ma faaaogā maota tetele i Sini nei mo faaipoipoga, tusigaigoa ma fonotaga ua avea ai le Maluapapa ma fesoasoani tele.
O le Maota lenei a le EFKS i Fairfield ua sulufai i ai le atunuu mo nei faamoemoe. Na fesiligia le susuga i le Faafeagaiga o le faatonu, Rev Peleti Toese Toailoa ma le faletua ia Senetenari i lo la agaga tali atu i talosaga a soo se tasi o le atunuu.
“O le Maluapapa e le faapito Manu ia tasi i lona faaaogāina, o loo tatala i soo se tapuaiga ma se Ekalesia o loo fia maua se fesoasoani”.
O le Fono Aoao a tagata Samoa i Sini le isi faalapotopotoga e lē o iai se nofoaga mautu e faaaogāina lenei Hall matagofie toe taugofie lona tau.
O le sosaiete foi a Lau Samoa na faatasi ma le mafutaga a Tuaa Sinasina i le tausaga nei e pei ona lagolago e se kamupani lafo tupe iloga ma faatasi mai ai le Afioga i le Hai Komesina o Samoa i Canberra.
O le tulaga lelei o le Maluapapa i le magafa o le fetauaiga o auala agai i Cabramatta ma Fairfield aemaise Bonnyrigg ma Liverpool.
O se nofoaga e sailigofie e le mamalu o le atunuu e faapei o le malumalu o le Uniting i Lakemba lea e galulue ai Rev Faauuga Siitia ma Faatuai lea foi e faaaogā e tagata Samoa i Sini.
O le masii mai a le HRPP i Sini i le lua vaiaso talu ai sa feiloai ai le mamalu o le atunuu ma le faigamalaga i le ‘ava o le feiloaiga i le Maluapapa.
Na silasila ai foi le afioga i le Palemia i le mautu ma le maoae o lenei nofoaga ua fai ma sulufaiga mo tausala ma faaipoipoga.
E silia ma le lua afe ($2000) le tau o isi fale tetele faapea e umia e tagata papalagi ma isi atunuu. E lē gata i le taugata ae peitai o le saili o le inisiua poo le Public liability auā popolega mo le faaleagaina o le maota.
O le aso muamua o Tesema o loo fuafua e talimalo ai foi le Maluapapa i se Malaga mai Samoa auā le faailoaina o se ata tifaga. O le tau faamāmā avega e na o le limaselau tala Ausetalia. Na taualuga le saunoaga a le susuga a Rev Peleti Toese Toailoa o lenei galuega alofa mo le atunuu o se tofi mai le Atua.
Ua vaaia foi le maopoopo ai o Ekalesia eseese o loo faaaogāina lea fesoasoani tele a le Maluapapa.
