E taliga e fia logo mauga i Salafai i le molimau o le tina ia Tolu Faumuina a o ia pese ma saafi i le la mafutaga ma le tamā, Afioga Tuaopepe Faumuina Aperila. O le lagona o le tina na ia faapea ane ai, e tāua lona molimau i le la mafutaga ma lana pele a o soifua ma malosi, nai lo le toe molimau ane a ua lē lagona mai e Tuaopepe lona leo.
Na saunoa le tina i le alofa ma le faamaoni o le tamā i totonu o le aiga, o se tamā alofa, e fesoasoani i tagata e faasoa ma tufa lona iloa i lana fanau, auā a lelei mātua e taitai fanau i le ola ma le manuia. Na toe faamanatu ai e le tina le amataga o le mafutaga ma le saili auala atu o le manamea i le tausala, a o tau saili se maasoama a le tama.
Na mālie i le faafofoga a le auvalaaulia le saunoaga a le tina, auā o lenei tamā e tau lē faailo i le atunuu ona uiga tausaafia aemaise o lona soifua galue i le atunuu e pei ona fesoasoani ai i alo ma fanau o Samoa na soifua i Niu Sila i le polokalame o le ‘Aoao Malu Manogi o le Lolo’ faatasi ai ma isi foi tamalii o le atunuu, e pei ona faasalalauina i luga o le Radio Samoa i afiafi o Aso Lua o vaiaso taitasi.
O le tumutumu ai o le hall a Malaeola i le Aso Toonai ua mavae na molimauina ai le taupati atu o le mamalu o le atunuu aemaise o aiga, e pei ona auai atu i ai le aiga Sa Faumuina, aiga Sa Malaetai, aiga Sa Lauvi, aiga Sa Lemalu faapea le aiga Sa Maugagaoa, e patipatia faatasi le atoaga o le 80 tausaga o le soifua o le tamā ia Tuaopepe.
O le maualuga ma le matagofie o lea aso fiafia o le faatasi atu ai o le afioga ia Patele Iosefo Leaupepe Timu o ia sa taitaia le sauniga, faapea le afioga ia Patele Michael Endermann, o nisi o faafeagaiga o le AOG le susuga ia Mafi Sope, Paul Gibson mai le Ekalesia Nasareta, o le Peresetene o Malaeola le afioga ia Afuamua Maiava Lafaele, o le ofisa o Malaeola le afioga ia Maiava Setefano, faapea le peresetene o le Ekalesia i Otara ia Tamala Vitale ma le Ekalesia Katoliko. O aiga na malaga mai Samoa ia Faiumu Tioata ma fanau sa molimauina le aso fanau o le tamā.
O le molimau a le tamā ia Tuaopepe na saunoa faafetai ai i aiga ma uo aemaise o susuga i faafeagaiga sa auai atu i le faamanatuina o lona aso fanau, ae sa faatele lava lana molimau i le laua foi mafutaga ma lana pele; o se tina alofa ma tausi faamaoni ia te ia, na ia faafetai ai foi i lana tiute faaletina i totonu o le laua aiga.
O le solosolo lelei ma le manaia o le polokalame o le aso, o le tulai ai o le kapeteni o le vaa ia Seuamuli Leota e faagasolosolo ma faasoasoa le faamoemoe. Ae o le auga o aute, o le pepese ai o le auvalaaulia i le taumafataga na tapenaina e le Pacific Catering ma le vai taumafa na tautuaina e le Ekalesia i Otara.
Na saunia foi faafiafiaga a le fanau e molimoli ai o latou alofaaga ma faamanuiaga mo le tamā, ma faaiu ai loa i faiga meaalofa a Tuaopepe mo le mamalu o le auvalaaulia faapea susuga i faafeagaiga sa auai.
O le tofa ia Seuamuli Leota sa fai ma tootoo o le aso i faaaloaloga ae o le tofa ia Munai Matia sa tasi i ai le faafitiga o aleaga e faia le upu faafetai e talifaitau ai i le tootoo o le aso.
O faamanuiaga ma moomooga alofa o le faletua ia Tolu ma le nofoaalo, le aiga potopoto, o uo ma aumea mamae mo le tamā pele. E molimoli atu ai foi faamanuiaga o le pulega ma le aufaigaluega a le Radio Samoa ma le Samoa Times mo le Afioga Tuaopepe i le atoaga o le 80 tausaga o lou soifua.
