O le afiafi o le Aso Faraile ua tea na filifili ai e le Komiti Faafoe a le Leipa i Magele le susuga Christopher Oleva-Tanuvasa e avea ma ‘Youth MP for Mangere 2016’.
O le alii o Christopher o loo avea ma ‘Head Boy’ i le aoga St Peter’s College i Aukilani, ae e nofo lava i Magele. O lona tausaga mulimuli lenei i le kolisi ma o loo faamoemoe e faaauau pea lana aoga i le Iunivesete o Aukilani i le tausaga fou.
O le susuga Christopher e lē gata i le lelei o lana faaperetania, ae e poto tele foi i le faiga o lauga Samoa.
E to‘a 8 isi tamaiti aoga sa tauva mo le tofi o le ‘Youth MP’ mo Magele mai aoga e lima e aofia ai Southern Cross, Otahuhu College, Seventh Day Adventist, St Peter’s College ma le aoga Musalemi o Al-Madinah i Magele lava.
E ui e lelei uma latou sa tauva ma faaalia lo latou naunau e avea ma ‘Youth MP’ mo Magele, ae ina ua mae‘a le suesueina o latou tusi talosaga, ma avanoa sa fai ai latou lauga, ma taliga o fesili mai le komiti na faia le filifiliga, ua auautasi o Christopher ua agavaa e avea ma sui o Magele pe a tauaofia le Palemene a le Autalavou a Niu Sila i le tausaga fou.
O le faiga o le filifiliga o se sui o le autalavou e avea ma faipule autalavou mo Magele, e uia lava ala e pei ona masani i le filifiliga lava o sui tauva mo tofi faipule a le vaega faaupufai lava a le Leipa ia.
E muamua faia le tusi talosaga, e fai le lauga i luma o le vaega faaupufai, toe tali i fesili e fesiligia ai e sui usufono a le Leipa lava ia.
Ou te naunau ia faamasani le autalavou i auala o le polokiki e pei ona iai faiga filifiliga faapea. O lo‘u lava naunauga ina ia maua ai se manatu o nei tupulaga ia auai i faiga polokiki i Niu Sila.
E lē faapea na o le tu mo tofi faipule, poo tofi foi o pulega o Aukilani, e leai e lē na o lea. Ou te naunau ia mafai ona sailiili pea latou lumanai i aoga maualuga, ae ia o tutusa ma le latou tautua i le atunuu lautele, ma e auala lea tautua i le auai i le vaega faaupufai a le Leipa.
O le latou auai, e lē gata e sauniuni ai mo le lumanai e tulai mo tofi faapea, pe a avanoa nei tofi, ae ia faamasani i auala eseese e mafai ai ona fesoasoani i tagata lautele.
E lē gata i lea o le auai i vaega faaupufai e pei o le vaega a le Leipa, o iina e faamasani ai i tagata eseese o loo galulue mo le manuia lautele o le atunuu. E tāua nei fesootaiga, e lē gata o Samoa ma isi atunuu o le Pasefika, ae faapea foi Papalagi ma Maori ma isi tagata eseese, o loo galulue punouai lava ina ia saili le manuia lautele o le atunuu.
E tāua nei fesootaiga auā e maua ai le fesoasoani mai nei tagata pe afai e talitonuina o oe o se tagata lelei, o oe o se tagata faamaoni, ma o oe o se tagata e alofa i tagata lautele.
O le faatino o le tautua i le vaega faaupufai a le Leipa, e iloa ai e sui auai poo oe o se tagata agavaa e tatau ona latou lagolagoina mo le lumanai.
E lē gata e manaomia sui e tutū mo tofi faipule ma tofi o pulega, ae o loo sailiili foi tofi e tulai mo galuega o matagaluega a le malo i le taimi e tulai mai ai le faigamalo a le Leipa lava ia.
O le tāua o le autalavou, ona e sau se taimi see ese matou le aumatutua, ae ia oo atu i lena taimi ua sauniuni mai le autalavou e tulai e avea ma taitai o le lumanai.
O le tofi la lenei o le ‘Youth MP for Mangere’ e amatalia mai le aso 25 o Ianuari seia oo i le aso 25 o Iulai 2016. O le a fesoasoani ia te au i le faatinoga o le galuega faafaipule.
O le aso 19-20 o Iulai e malaga ai i Ueligitone e tauaofia ai ma isi ‘Youth MPs’ e 121 mai Niu Sila atoa. O iina e galulue ai i komiti faapitoa e iloiloina mataupu tāua i le autalavou, ma e maua ai foi le avanoa e fesiligia ai Minisita o le Malo.
O se avanoa tāua lenei e momoli ai leo o le autalavou i Minisita o le Malo e faatatau i mataupu o loo tāua ia i latou, aemaise i mataupu tau aoga, tau galuega, tau tupe maua, tau fale, ma le anoanoai o mataupu sa faapea ona lāgā i lauga a i latou uma sa tauva mo lenei tofi.
E ui e na o le susuga Christopher e mafai ona avea ma ‘Youth MP’ mo Magele, ae e momoli la‘u faafetai ia i latou uma lava na talosaga mai e fia tauva. Faafetai le loto tele, faafetai le loto toa. Auā o lenei galuega e lē faigofie.
E lē faigofie le tulai e faamasino oe e isi tagata i soo se taimi. E ui lava e lei faamanuiaina le isi vaega, ae faafetai tele mo le agaga saili malo sa ia outou uma.
