Ole molimau ale tina matua ia Faauta Savea Oleva Fili mai le afioaga o Vailima, e lē taitai ona suia lana ekalesia ole EFKS, ole lotu na galulue mai ai ona tuaa ia Seuoti Mose ma le faletua ia Sieni Mose.
E pei ona faailoa ele tina o ona mātua sa faiaoga i Malua ile tele o tausaga, sa iai foi lona tuagane sa avea ma faifeau i totonu o lea foi ekalesia, seia oo mai lava ile taimi nei o lea foi ua iai si ona alo, le faletua ia Freeda Unapo ua galulue nei ma tausinuu ile afioaga o Saaga Siumu.
Ole faasolosolo mai pea ole avea ole aiga ma faifeau mo le galuega ale Atua, ua faatuputeleina ai lava le soifua galue ole tina ia Faauta Savea ile faaauauina o lona galue ai ile tofi tiakono i totonu ole lotu, e pei ona amata mai ai le tofia o ia ma tiakono ile ekalesia EFKS i Vailima a‘o lei malaga mai i Niu Sila.
Soifua aoaoina
O lona soifua faaleaoaoga, na amata mai ile aoga a Malifa Primary School, ona sosoo lea ma le aoga a Leifiifi, faasolo atu ai ile aoga ale Aso Fitu a Lalovaea ma faaiu ai ile Kolisi o Samoa. Na faigaluega ile faleoloa o Molesi ina ua iu ana aoga ile 3 ile 4 tausaga ma fai le faiva ole tausi aiga e ala lea ile tausiaina osi ona tina ia Sieni Mose ina ua maliu si ona tamā.
O Faauta ole uii lea ale fanau e toaono a ona mātua ma ua toe ai foi o ia oloo soifua mai ile taimi nei, ae ua maliliu uma ona tuagane e toatolu ma ona uso e toalua. Ole talitonuga ale tina ile soifuaga faasamoa, ole ulumatua ma le uii ose fanau o i laua ia e faia mea ole aiga, ae ole ogatotnu ole fanau o i latou e tautua mai ile umukuka. Ole faasinomaga ma le taiala foi lea o loo faia i totonu o lona aiga i lana fanau e 11.
Ole tausaga 1987 na malaga mai loa i Niu Sila nei e sailiili matagi ai e ala lea i fomai ina ua maua le tamā ole aiga i ma‘i ole tino. Peitai na maliu le tamā ile tausaga 1990 ma nofo toatasi mai ai loa le tina ia Faauta ma tausi si ana fanau seia oo mai ile taimi nei.
O lea ua fai aiga uma le fanau ma ua manuia foi o latou aiga ma ose faamanuiaga tele lea ile tina ina ua vaaia manuia ole Atua i totonu i lona aiga.
Ina ua malaga mai i Niu Sila sa faaauau lona galue ai ile tofi tiakono ile EFKS i Papakura i lalo ole taitaiga ale susuga ile faafeagaiga ia Rev Tavita Taulealo ma lona faletua. Ile taimi nei o lea ua galue ile tofi tiakono ile EFKS i Panmure ile susuga ile faafeagaiga ia Pouniu Faamausili ina ua nonofo i Glen Innes.
Ole aso 3 o Ianuari 2017, na atoa iai le 75 tausaga ole tina ia Faauta Savea ma ose aso na faia ele Atua e olioli ma fiafia ai le fanau e 11, ale loomatua faapea fanau a lana fanau, ae lē gata i lea o uo ma ē masani, na auai e patipatia le alofa ole Atua e ala i nei tausaga e tele ua ia aulia ele tina.
O lona tamā faaleagaga ia Rev Pouniu Faamausili na fai ma ositaulaga e sii le taulaga faafetai ile Atua ona o lana faamalologa ma nei tausaga e tele ua tului ile soifua galue ole tina. Molimau foi le susuga ile faafeagaiga ile malosi ole loto ole tina i lana galue ai i totonu ole ekalesia, aemaise ai e limataumatau ai foi le ekalesia i lana tofa faaleatunuu e fautua ai le galuega.
Ae ole molimau ale tina ia Faauta, na ia faafetai ai i lana fanau ile tausiaina o ia, faafetai ile auauna ale Atua ia Rev Pouniu Faamausili ile galuega faaleoleo mamoe oloo fai mo ia, e ala i asiasiga, aemaise ai ole tatalo mo lona aiga.
O nisi o alofaaga ma faamanuiaga a lana fanau na tauala atu lea i pesega ma faafiafiaga e momoli ai lo latou agaga faafetai ile latou Nana ile galuega fita sa ia faia mo i latou a‘o iai ile taimi ole fitifiti o lona malosi.
O lona atalii ia Gaseata Galu ole lona lima o lana fanau sa fai ma fofoga ole aso. Ole tina foi oloo taulamua i meafai ale mafutaga a lona nuu o Vailima i totonu o Aukilani, lea sa molimau ai lava le susuga ia Papalii Lafulafu Peo, ose tagata e lē pe lana faautaga loloto i mea e fai, e loto alofa toe toa foi le loto e fai mea mo lona nuu i Samoa, e lē palaai e talanoa ini mea e lelei ai aiga, nuu ma ekalessia, ae talanoa lava ma faatino le mea oloo manao ai.
Ole taualuga o lona aso fiafia na momoli ai ana meaalofa teutusi ile paia ole auvalaaulia sa auai ma tatala ai loa le filialii.
