Tuumalo susuga Faifeau Toeaina Si‘ueva Gogo

O loo ufitia foi le ekalesia aoao a le EFKS i Samoa ma atunuu i fafo i lenei vaitau i le faavauvau, ina ua logo mai le tala, ua faamānavaina galuega a se tasi o ta‘ita‘i o le Ekalesia Faapotopotoga Kerisiano Samoa, o lē sa tulai i le tofi maualuga o le Sui Taitaifono ma le Taitaifono mo ni tausaga ua tuanai, le susuga i le Faifeau Toeaina ia Si‘ueva Gogo, e pei ona tuumalo ai i le Aso Toonai, aso 8 o Iuni i le maota gasegase o Tupua Tamasese Meaole i Motootua.
E tuumalo nei le susuga i le faifeau toeaina ua 68 tausaga o lona soifua, ma o loo galulue ma le faletua ia Faailoga Tunufai i le ekalesia EFKS i Manase i le motu i Salafai. E silia ma le 42 tausaga o auauna le susuga ia Si‘ueva mo lana ekalesia EFKS e pele ia te ia. O le ekalesia EFKS i Manase lea na galulue ai ina ua filifilia e avea ma Taitaifono Aoao o le Ekalesia Faapotopotoga Kerisiano o Samoa mai le tausaga e 2001 i le 2005, ma e tuumalo nei o loo galulue ai pea i Manase.
O se gasegase tuga na faataotolia ai o ia i le maota gasegase o Tupua Tamasese Meaole i Motootua i le vaiaso muamua atu, ae sa auai atu Si‘ueva i le fonotele a le ekalesia i Malua i le tausaga nei, 2013.
O ia o le taitai o le Matagaluega ma le Pulega a le Itu-o-Tane i Savaii. E tusia lenei lipoti e lei faamautuina le aso e faia ai ona toe sauniga i lana ekalesia sa galulue ai i Manase i Savaii.