Molia se alii ofisa sinia vaega Quarantine aumai o le aisa i Samoa

O loo faamasinoina nei i le Faamasinoga Maualuga a le atunuu se alii ofisa sinia o le vaega o le Quarantine i le matagaluega o faatoaga, poo le vaega a le Faaasu, le vaega lea o loo siakiina le aumai faasolitulafono i le atunuu o ni oloa e sao mai ai ni faama‘i tau faatoaga, ona o le umia o le pauta faasāina o le methamphetamine poo le aisa o loo silafia tele ai. O le alii o Junior Seiuli Patau, o Vaiala o loo molia i le faia o lea solitulafono. O le Aso Lua o le vaiaso talu ai na tulai ai Junior i luma o le faamasino Justice Pierre Slicer ma amata ai ona valaau molimau.
E pei ona faaalia e le itu a leoleo, o le aso 15 o Tesema o le tausaga ua mavae i le malaevaalele faavaomalo i Faleolo, sa maua ai e alii ofisa o le Quarantine na tiute se atopa‘u o loo iai i totonu ma se afifi o loo fafao ai le pauta faasāina.
O lē o loo molia sa alu atu e ave i tua le atopa‘u. I molimau a nisi o tagata faigaluega o le ofisa o le Tiute, Taualeoo Aifiti ma Ietitaia Iosia na ta‘ua ai, sa suesueina le ato ma maua ai le aisa, ma sa fesiligia loa lē ua molia ae o lana tali o ana meatotino.
Peitai o loo tetee malosi Junior i moliaga a leoleo, ma o loo faaauau pea ona valaau molimau a le itu a leoleo.
O le alii loia o Toleafoa Solomona Toailoa o loo tulai mo Junior Patau, ae o loia mai le Ofisa o le Loia Sili a le Malo, o Precious Chang ma Faaniniva Edelma Niumata, o loo tulai mo le itu a Leoleo.