O le sauniga faaleaiga o le tuumalo o le susuga Papaliitele Peter Fatialofa i le amataga o le tausaga nei, na faia ai le molimau a le afioga Lemalu Tate Simi, i lona tulaga sa avea ai o ia ma Taitai Malaga o le Manu Samoa i tausaga ua tuanai a o avea Papalii ma Kapeteni o le aulakapi a le atunuu.
O le Aso Lulu ua mavae na logo tala ai le Malo ma le atunuu i tala salalau o le tuumalo o le afioga Lemalu a o iai i Ausetalia i lona tofiga o le Hai Komesina o le atunuu i lea Malo e pei ona sa filifilia i ai i le tausaga e 2009. E tuuina atu lenei lipoti mo le faasalalauina e lei maua mai se faamatalaga i le Malo poo lona aiga i le mafuaaga o lona maliu.
Peitai o ia o se tamalii e lē tau faailoaina le tele o ona tomai ma lana tautua sa faia mo le Malo i le tele o tausaga. O ia foi o se tasi o tamafanau a Samoa sa tautua i le Malo o Niu Sila i ni tausaga o lona talavou a o nopia‘i ai i Aotearoa i tausaga ua mavae, a o lei toe taliu i le atunuu ma tautua ai i le Malo, o nisi o faalapotopotoga ma taaloga.
Sa avea o ia ma Pelesetene o le Koluse Mumu a Samoa mo ni tausaga. O le sunami na aafia ai le atunuu o Papua Niu Kini i ni tausaga ua mavae a o avea o ia ma Pelesetene o le Koluse Mumu sa taulamua ai i se sailiga tupe a le Koluse Mumu a Samoa mo le fia fesoasoani i tagata o lea atunuu na aafia.
E tele foi isi sailiga fesoasoani a le faalapotopotoga sa ia faatautaia a o lei suia le tofi pelesetene o lea faalapotopotoga tāua. O tausaga o lana tautua i le Malo sa galue mo le Matagaluega o Leipa seia oo ina avea ma faauluuluga. O se tofiga sa ia umia seia oo ina tofia e avea ma Hai Komesina o Samoa i Ausetalia.
O le vaiaso nei o loo iai le fuafuaga o le a to‘ai taunuu ai i Samoa lona tino maliu mo le faia o ona toe sauniga. E toafā o la alo ma le faletua le afioga Peseta Noumea Simi, o se tasi o tina o le atunuu ua tele tausaga o lana tautua i le Malo, e pei ona avea nei ma Pule sili lagolago o le Matagaluega o Tupe a le Malo.
O le Atua o faamafanafanaga e soloia ese ai loifofoga o le faanoanoa mo le nofoaalo ma le faletua aemaise o aiga, uo ma aumea mamae ona o le motusia o le mafutaga ma se tasi sa pele i loto ma agaga.
Tatou te tau fai lagona uma foi le loto faavauvau alofa ona o le tuumalo faafuasei o le auauna, le afioga Lemalu Tate Simi sa umia se tofiga maualuga ma faaaloalogia o le Malo o Samoa.
