“E leai ni ma‘i aitu na molimauina i le mafutaga,” o se faamatalaga lea a le sui sooupu o le Ekalesia a Iesu Keriso o le Au Paia o Aso e Gata Ai, Tupuola George Hunt ina ua fono ma tusitala e tau faamalamalama le mau tala feavea‘i, faapea ua maliliu nisi ae na matuā tigaina ma la‘u i le falemai nisi o tupulaga talavou sa faia se mafutaga na nonofo faatasi ai i le lua vaiaso talu ai.
Ua alu le vaiaso na tea nei o talanoa le lautele o le atunuu i lenei mataupu ae e leai lava se tasi na faamaonia se faamatalaga se‘i vaganā ai i latou sa i lenei mafutaga. O le faamatalaga na sau i totonu o le lotoā a le ekalesia i Pesega lea na faia ai le faatasiga.
E silia i le to‘a 200 tama ma teine talavou na ave i fofo Samoa atoa ai le falema‘i ina ua laga lenei mataupu. E faapea o se tasi o po o le mafutaga lenei na vaaia ai le oso faama‘i malosi o ma‘i o nisi o tamaitai ma alii talavou. E foliga mai nei ma‘i ua ulufia e le agaga leaga nei teineiti.
Na ta‘u mai e nisi o tama talavou sa iai i lea mafutaga, na si‘o e le toatele o i latou le nofoaga i le ogatotonu o le faletaalo lea na momoe ai ae fai tatalo ina ia tutuli ese agaga leaga ua vaaia e i latou ua aafia ai nisi o sui nei o le mafutaga ma e to‘a 60 le numera lea na faalauiloa o i latou na matuā tigaina lava.
O le lipoti na amata ona vaaia nei uiga i le itula e 10pm i le po o le Aso Faraile ae faatoa uma tauiviga ma le tiapolo i le itula e 3am i le vaveao. O nisi na faapea mai na ave ai lava i latou na aafia i le falema‘i ae o lea na molimau le pulenuu o Lepea na faapea ona la‘u atu ia i latou i lo latou nuu nisi e tusa ma le to‘a 20.
O le talitonuga o le pulenuu o Lepea ia ….. ua soli e le fanau tapu o eleele nei e i Faleata ona talu lava le amataga o lenei mafutaga na faalogoina le pisapisaō leo tetele o le fanau ia latou faaili ma pesepesega i le leva o le po ma na fautuaina lava ae e lei taofia ai le pisa.
Na ta‘ua e lea tamā o tamaitai na faapea ona fai i ai galuega o le fofo ma le tama e toatasi na faapea ona faatino e lona aiga le ifoga ma faamanuiaina ai lava i latou uma i fofo na ofo atu i ai.
O le mau a le Ekalesia i le fono ma tusitala, na ave i le falemai ma o le tala na sau o se tulaga ese e ta‘ua o le delirium lea na maua ai le tupulaga. O le uiga o lea tulaga o le mafaufau, e lē mautonu, e fiva, e oso ma‘i e pei ona vaaia i lea po ma e mafua mai ona ua maualuga le fiafia, ua lē lava le taumafa ma le vai i le tino ma ua iai ma se tulaga ua o latou vaaia ai ni vaaiga e lē masani ai.
Faaalia e le Ekalesia o lea na togafitia lava le tupulaga ma toe foi ai i le manuia ae o le faamatalaga faapea na ulufia e le agaga leaga, e lē faamaonia.
O le taeao lava o le Aso Toonai na ta‘ape ai lava lenei mafutaga ae o le teine lea na faapea faamatalaga na maliu ma ua toe faafoi i Amerika Samoa, na ta‘ua e le lotu e lē moni foi nei faamatalaga auā na saili le ekalesia i le malaevaalele ma kamupani vaalele ma maua ai e leai se tino maliu na avatu i Samoa nei agai i Amerika Samoa i le vaiaso na tea nei.
