O lagona o le fiafia na saunoa i ai le afioga ia Lavea Tulaga Pune Fonotaga, ina ua mafai ona faataunuuina se tasi o sauniga fiafia i lona soifuaga, o le tuufaatasia lea o ia ma lana manamea ia Lei Togiatomai i le sauniga o le Sakalameta o le faaipoipoga.
O se sauniga na faatumulia i uo ma aiga aemaise o la aumea mamae lea na faataunuuina i le Togalaau o le Botanic Gardens i Manurewa i le Aso Toonai na tea nei, 23 Novema 2013.
O le afioga ia Lavea o se alo e faasino i le afioga ia Tagaloa Fineaso ma le faletua poo le afioga foi ia Vaeolenofoafia Teta mai le afioaga o Satuimalufilufi, Samatau ma Sataoa.
O le tamaitai faaipoipo ia Lei Togiatomai o se alo e faasino i le sususga Ioani Togiatomai ma le faletua ia Sarai mai le afioaga o Faleaseela ma Mulifanua.
O upu masani lava na faalogoina i lea aso, ina ia faamanuia le Atua i le aiga fou ma ia fua tele le niu aemaise ia tumau le aiga i le alofa ma le faamaoni o le isi i le tasi e mafai ona sologa lelei ai se ulugalii.
Na mae‘a le sauniga lotu ona faatasi atu lea o aiga na lua ma uo i le Community Hall i Otahuhu e faataunuu ai le taumafataga tele na saunia lava e aiga na lua ma o latou aiga ma le ulugalii fou.
