O sauniga faaolaola, o se tasi o faiga faakerisiano e manaomia tele i totonu o aiga ma soo se ekalesia Kerisiano. O fefaasoaiga i auala ma faiga e sailimalo ai i le Atua ma lona finagalo, o aga masani e tatau i le soifua galulue ona faataunuuina.
E le gata i lea, o le tufaina o meaalofa ua taulimaina e taitai ma auauna a le Atua i fatafaitaulaga eseese, o se tasi o faamanuiaga e tatau ona maua ma tofo i ai tagata lotu, mo le lumanai ma le faamoemoe ola o ekalesia ma tagata tapuai. O le faatuatua gaioi e le pine ona tali mai i ai le Atua.
O le sini autu lea sa faatāuaina ma ave i ai le faamamafa e le faletonu o ekaleisa a le Worship Centre i Henderson, Aukilani i Sisifo, Aukilani Tutotonu, faapea ma Onehunga. O se sauniga faapitoa mo faamalologa o gasegase sa tumutumu i finagalo o le Aufaigaluega, susuga Pastor Faapopo, Pastor Masi, faapea Pastor Tuilagi.
Sa molimauina le toatele o le mamalu o valaaulia sa auai, ae o si fiafiaga tele ona o le taupati o alo ma fanau laiti, aemaise o le sagisagi e talisapaia tiute ma galuega sa tuuina i ai e faatinoina. O aitema o pese ma siva faaleagaga sa avea foi ma vaega o lea sauniga, sa ogatotonu i le ekalesia a Pastor Tuilagi ma le faletua ia Faafetai, i Aukilani Tutotonu.
O lea faletolu o ekalesia, o le a faaauau pea lava ona faia a latou sauniga tuufaatasi i faaiuga o masina taitasi, mo le faamoemoe e saga tapue ai pea ma faaiila meaalofa mai le Atua ua faaaupuegaina ai nisi o auauna, auā lava le faamoemoe ina ia penefiti ai tagatalotu, ae silisili ai se viiga o le Atua.
O galuega faatino foi a le aufaigaluega o loo faapolopolo, ma faaagaga mo galuega tala‘i i le molimau atu lea mo ni agaga fou mo le Atua ma lona malo. O se feiloaiga ma taitai o ekalesia soofaatasi e tolu e pei ona ta‘ua, sa latou molimau ai e faapea o se faiga ua leva ona tatalo ai mo le faataunuuina, ae e lē māmā ia i latou, se feau mai le Atua faapea le taitaiga a le Agaga Paia, mo lana galuega.
E le faia fua ni polokalame, e le faaosofia gofie foi ni manatu mo ni faiga faapea, auā o mea uma, o loo faalagolago pea i le taitai sili o le ekalesia na te aumaia faatonuga ma fuafuaga mo lana fanau.
