Na leai se ofi o totonu o le Choice Banquet Hall i Otahuhu i le aoauli o le Aso Toonai 28 o Iuni i aiga o le tamā ia Aiono Finai Aiono ma le tina ia Asiasiga Aiono aemaise o le la ekalesia Katoliko i Glen Innes e pele i o la loto, a o agai atu e molimauina ma patipatia le faamanatuina o le atoaga o le 80 tausaga o le soifua o le tamā.
Na mafuta mai ai foi nisi o ona alo mai Amerika, Samoa, faapea ma nisi o lona aiga mai Ueligitone. O lenei faatasiga, e ui o le faamanatuina o le aso soifua o le tama, ae ua maua ai ma le avanoa e toe feiloai ma mafuta faatasi ai si ana fanau o loo nonofo valavala i isi atunuu. O le afioga ia Patele Iosefo na saunia le tatalo e amata ai le polokalame ma faia le upu faamalosi e faafetaia ai le alofa o le Atua i le soifua galue o le tamā.
O le atalii lona lua o le toeaina e aumau i Amerika sa faatautaia le aso fiafia, le susuga ia Lolo Matauama Ioane ma o ia foi sa nafa ma faaaloaloga i le taimi mulimuli.
Na saunia foi e fanau o fanau a le tama, faafiafiaga auā lava le faamatagofieina o le aso o le latou tuaa. O le faleaiga a le Best Pacific i Papatoetoe na latou tapenaina le taumafataga, faatasi ai ma le musika tuitui a le susuga Seumanu.
O le tamā ia Aiono Fanai Aiono e toafitu le la fanau ma le tina ia Asiasiga, e mai le afioga o Fasitoo-uta ma Leauvaa, a o le tina e mai le alalafaga o Sapapalii.
