E tolu aso na usuia ai le uluai mafutaga faaleaiga (family reunion) a alo ma fanau ma i latou uma na soifua ma tutupu mai i le tina o Maioa Safuta faapea paolo ma gafa mai le afioaga o Satapuala.
O le Aso Tofi, aso 5 e oo atu i le Aso Toonai, aso 7 o Ianuari i le amataga o le tausaga nei, na faatasitasi uma ai i latou na malaga mai mo lenei faamoemoe i le aai poo le nofoaga tutotonu o Winmalee Christian Conference Center i Niu Sa Uelese.
O lenei mafutaga na faatasia uma ai i latou na malaga mai Samoa, Niu Sila, Amerika, Melepone ma Brisbane e aofia ai ma le toatele e alala i nisi aai o Sine ma Parramatta.
E fa (4) augatupulaga na tutupu mai i lenei tina o Maioa.
E 85 tausaga o le tagata matua a o le pito itiiti e 6 masina. O le 97% tagata sa mafai ona auai i lenei faamoemoe a o nisi sa lei maua lenei avanoa faaauro ona o tuatuano‘a ma le feagai ai ma galuega.
O le malumalu o le Ekalesia Katoliko i le palisi a Saint Thomas Aquinas na faaaogāina e tatala aloaia ai lenei mafutaga tāua e ala i le Taulaga Paia o le Misasa.
O le Afioga ia Patele Tovia Lui mai L.A. i le Setete o Amerika sa taitaia lea mafutaga i le taulaga o le Misasa.
O le Afioga ia Patele Tovia Lui o se tasi lea o lupe faalele poo se taulaga tagata a le aiga ua ofo lona soifua mo le Atua ma lona finagalo.
O se faamoemoe autū o lenei mafutaga faaleaiga na faatāuaina ai le feiloaiga o tupulaga e fefaamasaniai auā le nofo silafia i aso o i luma ma tupulaga fai a‘e.
Na faaaogāina e le komiti faafoe le auivi o le tatalo faatasi i le taeao ma le afiafi, aai faatasi, taaalo faatasi, ae faasili ai le fetufaaiga faatasi i le Afioga a le Atua e ala i fesili ma tali ma faafiafiaga sa faaaogāina ai le karioke.
Sa faia ai foi le ‘ava o le feiloaiga ma o se agaga fiafia lea i le molimau a alo ma fanau na faatinoina lea vaega tāua o le aganuu.
O se mafutaga vavalalata ma le mafanafana e ui ua na o ni nai aso peitai na taualuga i se fonotaga tuufaatasi a le aiga i le taeao o le Aso Toonai e fefaasoaai ai ni lagona faaalia mo le agai i luma. Na autasi finagalo e toe usuia le isi faatasiga poo le reunion i le tausaga e 2014 pe a tusa ai ma le finagalo o le Atua.
Se mea ina a matagofie o uso ae fealofani ma nonofo faatasi, ae pagā lea o se mea ina a lē manaia o le faatofa ma tetea e pei ona vaaia ai le laufofoga maligi ma le fefusiai o le alofa moni ua tupu ma ola.
O se lagona fiafia ona sa mafai ona feiloai atu i latou i nisi foi o toe ulutaia ua afu le soifua aemaise o le tupu ma le ola o alo ma fanau i totonu o le aiga.
O lana Afioga foi ia Patele Tovia Lui na ia tapunia aloaiaina le mafutaga i se Misasa a o lei tatalaina le filialii ma foi atu i nuu ma alalafaga ua aumau ai.
O le isi ‘auga o aute o aso faapenei e iloa ai toto moni.
O le taimi nei ua amata toe taliu le tagata ia i le aai ua nofo mau ai ma ua tulimatai mo le isi mafutaga i le tausaga e 2014.
