O le faailoga pito sili ona maualuga ua manumalo ai se aiga i Samoa o le National Lotto ua faafoe nei e le malo e $600,000. O se aiga i le itumalo o Anoamaa i Sasa‘e na mauaina ma o se tasi foi sa avea ma faipule o lea itumalo na manumalo ai i le tausaga ua mavae.
O le tausaga fou lenei ua see le manumalo o le faailoga muamua o le National Lotto i Savaii lea ua manumalo ai se tamā ua silia i le 66 tausaga o le soifua mai se afioaga o le itumalo o Palauli le Falefa.
“O se tamā sa leoleopo ae ua litaea mai lana auaunaga i se Ofisa Tumaoti a le Malo”, o le faamatalaga lea mai le pulega o le taaloga.
O le faletua o lea tamā ma lona atalii na la momoli i le ofisa autū o le taaloga i Apia i le Aso Lua, aso 11 Ianuari 2012 le pepa ua manumalo.
Faaalia e le ofisa o le Lotto i se faasalalauga e faapea: “Na faaalia e le tina o le Aso Toonai 7 o Ianuari 2012 na se‘i ai le Lotto e lei iloa e i latou, ona sa pisi lava i le alalafaga auā le faamavae atu mo le la fanau mai Ausetalia.
Na latou malaga mai Savaii i le Aso Sa, ma sa iai se faaletonu o le tusifolau o se tasi o le aumalaga ma lē mafai ai ona faataunuuina le malaga, ma sa toe manaomia le totogiina o se seleni. Sa toe foi ai loa i Savaii ma le faanoanoa ma le lilo i manatu o le lē oo o le latou malaga, ona o loo faatali mai se manumalo tele mo i latou. Na faato‘ā iloa i le Aso Gafua o le pepa a le toeaina o loo manumalo”.
