O le igoa o le apitaga lea mo tagata tafafao maimoa mai i fafo o le Samoa Village Fales, o se nofoaga e pulea e le sa avea ma Faifeau o le Afioaga o Solosolo ini tausaga ua mavae, le susuga Falefatu Enari ma lona aiga.
O ni fale Samoa e maua le lima, o loo faatutu i luma ane o le fale o loo faamautu ai le faafeagaiga ma lona aiga.
O se nofoaga o loo i le lisi o apitaga o aiga o loo mafai ona nofo mautotogi ai nisi e malaga mai i Samoa.
O le tolu vaiaso talu ai na malaga mai ai tamaitai o Sana Khan faapea Lauren Harris, oni teine aoga faafomai, ua tau faaiuiu a la aoaoga i totonu o Peretania ma ua o la filifilia Samoa e avea ma nofoaga aua vaega mulimuli o a la aoaoga e galulue ai i le Auaunaga faa-Fomai i Samoa ao lei toe taliu mo faauuga i Peretania lava.
Faaalia e Sana Khan, na maea lava fesootaiga i luga o le internet ma o iina na o la maua ai ata o lea nofoaga ma manatu e manaia le taugofie ma e foliga mai o se nofoaga e talafeagai ma le utiuti o le seleni o loo ia laua, o alauni mo tamaitai mai i le aoga ao nonofo ai i Samoa.
Faaalia e Khan ao lei malaga mai i Samoa na saini lava le feagaiga aua le nonofo ai i le Samoa Village Fales ma na totogi le vaega muamua o le la pili. Mo aso e 10 e $800 le tupe na faatonuina e tatau ona totogi ma e sau ai ma le ti o le taeao i lea pili.
E sili laititi atu i le $200 tala na totogi mai lava i luga o le internet, ao lei malaga mai ia tamaitai.
Ta’ua e le tamaitai o Sana Khan o ia na muai taunuu mai, pe tusa o le fa i le vaveao ma o le tuutuuga e fatali i le malae vaalele i Faleolo, o iina lava na muai tulai mai ai faaletonu ona na alu atu le taavale ma le faatonuga e totogi lava e ia le agai atu ai i Faatoia mai i le malae vaalele.
Ta’ua e lenei tamaitai, o le mae’a o le 25 itula talu ona malaga mai i luga o le ea ma le leva o le po ina ua taunuu na talosaga ai i le alii Pule pe mafai ona totogi atu lana pili i le taeao e sosoo ai ae na manao lava le alii Pule e faatea ese loa le pili mo ia ma le tamaitai o Lauren, lea faatoa taunuu mai i Samoa i le aso na sosoo ai.
O le maea o finauga i le totogi o le pili i le taimi lava lea na moea ai le mataupu seia oo i le aso na sosoo ai. Faaalia e Khan na totogi le tupe ae toe faaopoopo atu ma le faamanatu e tatau ona totogi atu le isi vaega muamua o le pili, le vaega lea na ta’ua e lenei tamaitai ua maea ona totogi mai i luga o le internet.
Faaalia e le tamaitai lenei le faanoanoa tele ma o lana uo na sau lava ia mai i Faleolo ina ua taunuu mai i Samoa e leai ma se isi na faatalia o ia i le malae vaalele. Ta’ua e nei tamaitai, e manino e ese lava ata na tapu’e ma tuu i luga o le internet, ese foliga o le apitaga ina ua taunuu atu. I la’ua faamatalaga fai mai, e palapala le siosiomaga, e leai ni sitepu i fale Samoa ua faamautu iai.
A tu ai le tagata e tau lelei le ulu i luga ma e talu ai e tutu tonu ini nai mita mai i le alatele e matua le mafai lava ona faia se gaioiga e pei o le sui ai i totonu o ia faleoo.
E iai le potu ai o le fale lea e faamautu ai le pule ma lona aiga, na ta’ua e nei tamaitai, o iina e sui ai lavalava. E tuu uma ato a le au asiasi i se isi potu laititi i totonu lava o le fale o le Pule ma lona aiga.
Faaalia e Lauren Harris, o taifau e saoloto le feoai i faleoo ma e oo i le fale tele lea e aai ai e feoai solo ai taifau ma pusi.
E leai foi se aufaigaluega ua na o le fanau teine a le Pule, o le isi e 12 tausaga le matua ae o le isi e 10, o i la’ua ia na feagai ma malo o loo nofo totogi ai i lea nofoaga.
Faaalia e Harris, “E lelei lava teineiti ma e taumafai lava ina ia fai lelei le galuega o le aumai o le ti o le taeao ma isi feau e moomia ai, ae a iai ni fesili poo ni faitioga foi a le au asiasi mai i lea apitaga, e faigata tele ona e fai i le tamaititi e na o le 10 pe 12 tausaga”.
Ta’ua e nei tamaitai, e faigata tele le taumafai atu i le alii pule pe mafai ona toese nisi aso e nonofo ai i ona fale Samoa ona e le o lelei ai le la nonofo, ae o le tali a le alii Pule ua maea ona saini le konekarate ma e le tatau ona toe alo ese ai ia tamaitai.
Na nonofo ai lava nei tamaitai seia maea le 10 o aso see ese loa mai i le Samoa Village Fales. Faaalia e Harris, o faamatalaga uma faatatau i lenei nofoaga o loo faalauiloa i luga o le internet, e le faamaonia nisi o ia faamatalaga ona e oo lava i le umukuka faapea e faaaoga tele e malo, o le umukuka a le aiga o le faafeagaiga, ma e i se isi fale e ese mai i le nofoaga o loo faamautu ai o latou lavalava, sui ai ma aai ai.
Fai mai Harris na otegia i laua i le faitio soo atu ma e na faapea atu le alii Pule o i laua o tamaitai o loo faaolioli le avea ma fomai ma e tatau ona maua le tomai e malamalama ai i le konekarate na sainia ma le feagaiga i le va o le apitaga lenei ma i laua.
O le faamatalaga a lenei tamaitai e le toe iai se manaoga e fia nofo i ia ituaiga nofoaga, aua e leai ni nofoaga ua faataga ona tali ai ni malo pe afai o le faiga lea o a latou auaunaga.
Na faafetaia e nei tamaitai le faletalimalo o le Tatiana lea na toe see iai ma ua tolu ai nei vaiaso o nonofo ai ona o le eseese ma le nofoaga muamua sa iai.
Ua sauni nei tamaitai e saili se auala e mafai ai ona toe faafoi ane se vaega o le la seleni na totogi ona o le la mau ua matua le talafeagai lava le tupe na totogi ma le taligamalo lea na maua mai i lea nofoaga.
Ta’ua e nei tamaitai na taumafai le alii Pule e ofo atu se taumafataga e faia i lo la fale ina ua o la logo le Pulega o Faletalimalo i Samoa faatatau i lea mataupu ma na o la teena.
Faaalia e le alii Pule ua maimau le taimi na ofo atu iai le taumafataga ona o lea ua faauiga sese e tamaitai nei.
O le finauga a le alii pule, o le tele o malo a lana apitaga e fiafia i meaola ma o le vaiaso na te’a nei na faatau atu ai nonoa o taifau. Sa iai se isi ulugalii Siamani sa nonofo ia te ia na ta’ua e Enari sa momoe lava ma se tasi o pusi fagafao a le latou fale.
O le finauga e tau faasese nofoaga o loo tapue atu ata i luga o le internet na ta’ua e le alii Pule, o fale lava la o loo faalauiloa o fale ia o loo tali ai ana malo.
Sa ta’ua foi e le alii faifeau, o le faitio o nei tamaitai na mafua ai le ita o lona faletua ma otegia ma o lana faamatalaga na le fiafia ai ia tamaitai, e tumau le tau o fale e pei ona saini ai le konekarate ae ua taumafai e o ese mai i le maliega ua sainia.
Faaalia foi e le faafeagaiga, e le o sana galuega le alu e aumai malo mai i le malae vaalele, ma e faatonu lava taavale e mafai ona aumai ai ana malo mai i Faleolo i Faatoia, e totogi lava foi la e le tagata lona auala e agai atu ai i le Samoa Village Fale.
O manaoga uma o ana malo na taua e le faafeagaiga o loo faatino lava e pei ona iai aiaiga o soo se tasi e faatino se atinae faapea i Samoa nei.
