“faia mea sili, faatali mo mea silisili”
O le faatinoga o le alofa i aso taitasi, e maua ai le soifua fealofani o se aiga, o se aulotu, o se sinoti, poo se ekalesia aoao e amata mai i le au faigaluega, alii ma faipule, auso fealofani ma tamaitai, o autalavou ma aoga aso sa, o aufaipese ma soo se faalapotopotoga e tau ai le igoa o le ekalesia ma tautua ai mo le finagalo o le Alii e ou le Ekalesia.
Ua faapena la ona ofaga potopoto ai le Matagaluega Metotisi Kalaiesetete o loo taitaia e le tausi matagalega, Rev Ale Palelei faatasi ma le nofo a matafale fitaituga o le aulotu e ala i le latou tausala lea sa faatinoina i le aso Toonai ua mavae atu nei i totonu lava o le latou tuamaota Siulepa hall.
O le auga o le faamoemoe o se sailiga tupe aua le faaleleia o galuega tau atiae i totonu o le matagaluega aemaise le malumalu o loo latou tapuai ai.
O se aso faatumulia aemaise o le maitau atu i nai tina ma tama ua matutua le soifua o le aulotu, e ui i le timu ma le malulu ae sa taupati ane lava e opogi le faamoemoe ma nai o latou laei aulelei ua felanulanuai ai le aso ma ua tepa i ula, tagai i matagofie le faamoemoe o le aso, ma o fua aliali ia o le alofa o le Atua.
“Ese le manogi lelei o le galulue faatasi ma le faamoemoe e tasi, o le sini lea ia taulai iai le silasila”, e pei ona saunoa faalaeiau le alii faifeau Rev Ale Palelei.
O le fofoga o le matagaluega, Falefa Fetu mai Satapuala sa faatautaia le aso, ma o le latou uluai tausala foi lea o le amataga o galuega faa ekalesia o lenei tausaga.
Manaia tele le tutua ma le matautia o musika tuitui o le aso fiafia sa faafoeina e le tulafale Salamumu o Taumai Leoo, ma faafetaia ai pea le tautua a le susuga Vili Ieru mo lana tautua e ala i musika faasafua mai mo le atunuu ma ekalesia.
Ua nofo tapena foi le matagaluega mo le faailogaina o le latou aso fanau 40 tausaga talu ona faatuina le lotu i totonu o Kalaiesetete i le masina fou pe a aulia.
Na faaiuina le aso i le manuia ma faafoi ai pea le viiga o le Atua, o le tupe na lafoina e matafale i lea lava aso e $3200, ia ona alo lea i le taumafataga na ofoina e Maelega ma le faletua Tiresa, o se tasi o matafale o le aulotu. Ua tatau ona tatou lagona ma iloa mea silisili ua faia e le Atua mo le Ekalesia Metotisi ma ona tagata, aua e taia i le faalogo ma vaaia e mata galuega lelei na faia e tuaa ua mavae.
E le faigofie le tauasaina mai o le galuega, peitai ua tatou sagisagi ma faaauau le galuega ona o le tauivi ma le onosai, ma le alofa ma le faatuatua.
