O le nusipepa o le Samoa News i Amerika Samoa na salalau mai ai se tala i ni lagona lē fiafia ma faanoanoa o se tasi o tamalii o le nuu o Leone. O lagona faaalia o lea matai na faatūtū ile alii Palemia, Susuga Tuilaepa Lupesoliai Sailele Malielegaoi, i lona faamuta o le taimi o le faafiafiaga a le afioaga ile aso na faamanatu ai le Tutoatasi, le Aso Lulu aso muamua o Iuni 2016.
Ua lalau e le matai Leone le lē mafaufau o le Palemia o le taitaifono o le komiti o le Tutoatasi ona o le taofi o le latou faafiafiaga ae o latou sa valaaulia. O le tala foi a le matai Leone ile lipoti a le Samoa News, sa avatu le tala o latou e lē taofia faafiafiaga ae na o aufaafiafia i Samoa e 20 minute le umi faatulagaina.
Ua fesiligia le afioga ile Palemia i sona finagalo ae ua tali Tuilaepa ma ia faaalia, e leai ma se tala i se lē fiafia o Leone ina ua feiloai ma taitai o le aumalaga ina ua mae‘a le latou faafiafiaga.
O le finagalo o le palemia o se tuua’iga na faia lava e le nusipepa ina ia taulia ai, ma e tutusa lelei le nusipepa i Tutuila ma se tasi o nusipepa i Samoa e faasino ile Samoa Observer.
Fai mai le Palemia ua amioa‘i nusipepa ile saili o ni tala e taulia ai.
O le valaaulia o Leone e lē gata o le aufaafiafia e faia ai ma le pese ae na valaaulia ai foi ma le fautasi o Leone. Peitai ina ua lē faia ni tuuga fautasi i se faaiuga a le komiti o le Tutoatasi na lē mafai ai loa ona masii mai le fautasi o le afioaga.
Ile feiloaiga a le Palemia ma nisi o tusitala ile polokalame masani i luga o le leitio i le Aso Tofi ua mavae, na faailoa ai e Tuilaepa le tulaga sa feutagai ai ma Leone a o lei malaga mai lana aufaafiafia, ma ua latou silafia lelei aiaiga o faafiafiaga.
Fai mai se tasi o molimau e telē sona silafia i feutanaiga na faia ma Leone e faapea, na taunuu le aufaafiafia ma sa savalia e sui o le komiti o le Tutoatasi ona o le fia silasila ile latou faafiafiaga e fua i ai le taimi o le polokalame.
Peitai e oo ane lava o le a amata le Tutoatasi e lei maopoopo lava le aufaafiafia ona ua lē avanoa nisi. O se itu lea sa faanoanoa ai sui o le komiti peitai sa logo i ai e na o le 20 minute lo latou taimi e tutusa uma ai aufaafiafia na togia mo faafiafiaga o le Fu‘a.
Ile finagalo o le Palemia i lana faatalanoaga ile leitio na ia faaalia ai, sa leai lava se mea e pa‘ū ai le taligamalo a le atunuu ile masii mai o Leone. E oo lava ile latou talosaga se‘i alu ese le Lady Naomi ile Aso Faraile na tuu avanoa lava i ai.
Na talosaga Leone ona o le fia tafafao pea ile atunuu ma faaalu ai a latou seleni.
