Ua fesilisili pea nisi o matai o nisi nuu pe aisea ua tapu pe faasā ai e nisi nuu mea masani e fai i faalavelave faasamoa e pei o maliu, saofai, ma faaulufalega. O ia tu masani o le alu o ni auala i se maliu ma se tuumalo, ia poo ni malo usu foi e auai i se maliu ma saofai aemaise o ni faafotu Tupu ma ni faafotu o le vaaulu.
O le tele lava o nuu ma afioaga e lē o iai ni tapu o ia mea ae o loo saoloto ai matai o isi nuu ma itumalo. O Solosolo o se tasi o afioaga sa lē tapu ai ni sula toga ma ni malo usu auā sa pei o se mea fiafia a matai o le atunuu le malaga i ai i se maliu ma isi faalavelave masani o le atunuu. E fai lelei e matai o faia le lotoifale o le afioaga pe a mae‘a se faalavelave faasamoa, ile ave i ai o taumafa poo palapala a malo, o tupe ma ie o le Malo poo le tofa.
Peitai ua faaalia e se matai o le nuu, ua foliga ua lē mafaufau amio a malo usu ona ua lē gata ina lē faamalieina po ua tagisa i ni palapala a Malo ma toe avatu ni toga ma se pasese ae ua latou ave uma ai ma tapenaga mai le faaaloalo a se aiga o le nuu e fai ai se faalavelave, ae matamata fua matai o aiga o Solosolo.
O le tuumalo o le afioga ile Faasisina Leota Leuluaialii Ituau Ale ile masina o Me 2016 na aliali mai ai ni amioga lē lelei a nisi matai ina ua faasoa le ma‘au o le aiga sa faia ai le tuumalo. Fai mai se molimau o palapala a malo na avatu ile nuu na uma ona faasoa i malo usu e faapea foi i toga ma tupe.
Na toe alu le sāvali ile aiga mo nisi faaaloaloga mo le nuu ma e lei teena. O le mae‘a o le tuumalo o le Faasisina na fono ai loa le afioga ile Taofia ma Saleutogipo‘e o le limatua o Faleupolu, ma faia ai loa le tapu ua faailoa ile atunuu i auala o faasalalauga.
Ua tapu ni malo usu, tapu ni sula toga ma ua tapu ai foi ma le ‘avamalosi ona toe tagofia e soo se tasi i le Aso Sa. Tasi lea o vaaiga sa faanoanoa ai tele nisi o tamalii o le nuu ile tuumalo o le Faasisina o le onanā o matai ma taulelea.
“O se vaaiga matagā tele ma ua aliali atu ai i le atunuu sa auai ile tuumalo le leai o se pulea lelei o amio”. o le saunoaga lea a se tasi o matai ua lē manao e faailoa le suafa.
O le fono foi lea na faasala ai se tasi o matai tulafale o le nuu sa fulisia i ai le finagalo o le nuu e nafa ma le va i fafo i ni faalavelave fai o Solosolo. E iai le talitonuga o tamalii o le nuu ma matai faasa‘osa‘o o le afioaga, o le a iai ni suiga lelei e tutupu mai ile faaiuga ua autasi i ai mo lenei taimi.
