O se osofaiga a leoleo na saili ai le fale o se alii pese ua faatau ana CD ma faafofoga foi i ai i ana fatuga i luga o leitio, na maua ai laau faasāina o le maruana ma taofia ai ni alii se toalima.
O le osofaiga na faia i Vaitele-fou e pei ona faailoa mai e se molimau o se alii leoleo, ma ua molia ai ia alii i le umia o le laau faasāina o le maruana.
Peitai na faamatala le molimau o le suesueina o ia taulelea na ta‘u ane ai ma ni suafa o ni leoleo se toavalu e faapea o latou foi ia e masani ona o atu ma faatau mai maruana i le nofoaga na osofaia e leoleo.
O le tasi o leoleo e pei ona faamatala le molimau, ua iai le faatanaga a le Komesina e alu e siaki ni faamatalaga i se nofoaga e laumanuia ai mai ai ni laau faasāina ia mautinoa lelei, ona faatoa alu ai lea o le osofaiga. O lona uiga e foliga mai o se tasi e alu faaleoleo nanā e lē iloa e se isi, ae maua ai faamatalaga e fuafua tonu i ai le faiga o se osofaiga poo se raid.
O le sailiga ia saga faamaonia ai lenei tulaga na fesiligia ai le komesina lagolago o ia o le sooupu le tofa Fauono Talalelei Tapu. O le faamatalaga a le sooupu o le a saili ona toe logo mai lea, peitai na uma lelei le vaiaso na tea nei e lei toe maua le sooupu i sailiga, e oo foi i lana faamatalaga e valaau mai i le tusitala i le telefoni, e lei taunuu.
O le Aso Lulu na tea nei na maua ai se molimau mai le ofisa o leoleo autu i Apia e faapea, o le faila o loo iai faamatalaga a taulelea e toalima na taofia ua fiu e saili ua lē maua.
Peitai o nai sailiga i le Aso Toonai na tea nei na maua ai ni faamatalaga mai se alii leoleo, o le faila o le mataupu ua oo i leoleo o loo galulue i le ofisa i Tuanaimato le Faleata police station.
O le faamatalaga foi ua maua mai lea molimau e lei oo i le pulega i luga o le matagaluega tuua‘iga ua laumanuia ai suafa o leoleo e toavalu ma faatauga maruana.
O le vaiaso nei e valaau ai moliaga o alii e toalima i le faamasinoga maualuga, ma o le a tuuina atu ai ni a latou tali.
O saililiga a leoleo e maua ai laau faasāina poo ni pauta faasāina e pei o aisa sa masani lava ona fofola uma mai i lipoti a le matagaluega faamatalaga, peitai ua molimauina pea le lē toe aumaia i se tulaga faalauaitele o ni mataupu faapenei, seia vagana ua iloa e tusitala se osofaiga pe ta‘u mai foi e nisi sa latou silafia sea gaioiga a leoleo, ia pe ta‘u mai foi e ni leoleo se osofaiga na maua ai ni faatoaga maruana.
