E 11 aulotu o le faasinoti ae na o le 10 lea na feagai ma le tuufaatasiga i le Aso Sa aso 27 o Oketopa, ona e fai sina maomao o le aulotu a Cairns lea sa faia i le pitonuu o Marsden i le itu i Saute o Brisbane.
O le uluai taimi lenei ua faatasia ai autalavou a le faasinoti talu ona suia mai le afioga i le Sea ia Rev Halefoti ma le faletua ia Seuoletoi Alainuuese ina ua tuua lana sionti sa galulue ai ma le faletua i Niu Sa Uelese.
E pei ona silafia sa avea Moloka Toleafoa ma faifeau poo le peresetene o autalavou ma Aoga Aso Sa lea ua ia tausia le ekalesia a Logan City ae ua faauluulu lava i le Sea ma lana auofisa le autalavou i le taimi nei.
Na matuai maofa ma faamalieina le aofia i tapenaga a autalavou taitasi e le gata o pese faitaga, tala ma isi vaega sa o latou faatinoina auā le aso faapitoa.
Na amataina i le 3 i le afiafi ae mae‘a ua goto atu le la i lona tauafiafi, sa lei iai se ‘iva auā na leai se tasi e lē fiafia i faamalosiau a tupulaga talavou o le faasinoti, ua o se taiala talafeagai foi mo le alo atu i tiute masani o le vaiaso fou.
Auofisa autalavou a le Sinoti Ekalesia Metotisi Kuiniselani: Taitai – Sea Halefoti & Seuoletoi Alainuuese; Failautusi – Selesele Asiata; Teutupe – Muagututi‘a Tota Tuala Galovale.
O le susuga ia Rev Tavita Faatoe o le failautusi aoao lea a le Sinoti Ekalesia Metotisi a Kuiniselani.
