“E matuā pepelo tele ia tala ua ave i luga o talafou a le FM”, le alii Palemia
Ua faalauiloa solo i lomiga, leitio ma televise a le atunuu le lē malie o le alii Palemia i se lipoti a le Talofa FM i lana vaega o Talafou ona o se lipoti na ta‘ua ai e lea alaleo ua taofia e le Malo fesoasoani mai i fafo o le sunami.
O se lipoti na faalauiloa i le vaiaso na tea nei ina ua mae‘a se fonotaga a Tusitala ma le alii Palemia i lona ofisa i le Maota o le Malo. E alu atu le lipoti a le vaega o Talafou a le Talofa FM i le taeao ae oo i le afiafi amata ona osofai mai le alii Palemia i le lē fiafia tele.
“E matuā pepelo tele ia tala ua ave i luga o talafou a le FM.
E lei iai sa‘u faamatalaga faapea na fai ma o nei tala faavalevalea sa tatau lava ona toe foi mai le tusitala e faamaonia ma toe fesiligia,” o le faagaulemalie faalauiloa lea a le alii Palemia.
“O le tala na fai atu na faatatau lea i le tulaga o iai fesoasoani mai i le sunami e pei ona iai nisi o aiga ua faaaogā fesoasoani nei sa aoina ma aumai i lalo o le igoa o le sunami ae ua faatietie mai ai ma nisi o meaafale a aiga lava latou ma o tagata, na na ou fai atu e tatau ona saili ma e tatau ona taofi ia faiga,” o se faamatalaga lea a le taitai o le Malo.
“O outou tusitala e fai lava ma fesuiai le faiga o faamatalaga ma o le mea lena e popole i ai auā e tatau lava ona toe foi i le tagata na faia ia faamatalaga”.
O le mataupu lenei na lāgā ona o le talanoaina e le alii Palemia o le tulaga ua iai nei le faasoaina o fesoasoani o le sunami lea ua lata i le tausaga talu ona aafia ai afioaga o Samoa.
O le faamatalaga a le taitai o le malo, talu ai o loo faaauau ona lafo mai pea foai ma fesoasoani aemaise mai i aiga i atunuu mamao, ua iai le manatu e fautuaina i latou ina ia vaavaai i fesoasoani e pei o le aumai sa‘o o le tupe poo nisi oloa e lē faatapulaa le aogā ona o le tele o taumafa na aumai ma faasoa o le tuai ona oo mai o isi uta e fetaui lava le aumai i Samoa ae ua lē aogā aso faatapulaa ma leaga ai.
Na saunoa foi le alii Palemia o le tele o le isi tupe alu a le Malo o le itu lea o uta o taumafa ua mafai ona aumai i fafo, e toe totogi e le Malo le aumaiga i tua mai i le uafu ma o nisi o uta na aoina lava e tagata mai i fafo oloa i le amataga o le tausaga ae o lea faato‘ā taunuu mai isi uta ma ua faaleaogāina le tele o nisi o taumafa tuu apa o loo aumai ai.
O le faafetai e lē uma a le taitai o le Malo ona o le agalelei sasaa mai pea a aiga mai i fafo, ae ona pau lea o le tulaga na saunoa ai le alii Palemia ina ia mafai ai ona taofi nisi o faiga ua vaaia nei le aliae talu ai faamomoli o le sunami mo Samoa nei.
Ae mo le aufaasalalau na faapea ona otegia e le alii Palemia i lenei vaiaso e lei iai se faamatalaga na mafai ona aumai se‘i vaganā ai le faapea mai i le tatou pepa na logo atu lava e le alii Palemia lona lē malie ina ua faasalalau atu le lipoti.
