I le 23 tausaga o seei le susuga Hans Joackim Keil poo Joe Keil o loo silafia ai i le tofi faipule mo nofoa e lua o le aupalota taitoatasi i le Palemene o le atunuu, ua ia faailoa nei lona faamoemoe e litaea mai lea tofiga ae see ane e faagaioi ana pisinisi e pei o le faleaiga o le McDonalds ma le taaloga o le Lotto Samoa lea e mae‘a ia Tesema o le tausaga a sau le laisene ma tapunia ai loa.
Ua faaalia ai e le sui a faipule o loo avea nei ma minisita lagolago o le matagaluega o Fefaatauaiga, Pisinisi ma Leipa faapea le Pulega o Tagata Tafafao, ua iai lona lagona o se taimi talafeagai lenei na te tuua ai le taaloga o polokiki poo upufai o Malo, ae avanoa ai isi sui talavou o le au palota taitoatasi e tauva mo lea tofiga maualuga ma taualoa.
Ua faailoa ai foi e Joe Keil lona lagolagoina o se tasi o sui tauva faaolioli mo le au palota taitoatasi le faletua o Sina Retzlaff Lima o se alo e faasino i le afioga i le Sui Palemia, Misa Telefoni lea o loo avea nei ma Peresitene o le faalapotopotoga o le au fai pisinisi poo le Chamber of Commerce.
O le uluai faipule sinia lea o le palemene ua faailoa lona tuua o le tofi faipule ae toe ono masina ma vaiaso o loo totoe ona faia lea o le faiga palota tele a le atunuu i le tausaga fou.
O ia foi o se tasi o faipule na matauina le faatuatuaina i le taimi o faigamalo a le HRPP a o avea Tofilau Eti Alesana ma Palemia sosoo ai ma Tuilaepa L Sailele Malielegaoi. Peitai i le mae‘a o le palota tele o le 2006 e lei toe filifilia o ia i se tofi minisita, ae sa filifilia le tasi o faipule o le au palota taitoatasi le Susuga Niko Lee Hang.
O le fuafuaga a le Malo i le suia o le itu auala na matauina le suia ai o lagona o le alii faipule o Hans Joackim Keil ona o ia le isi faipule sinia ma leva o le HRPP na tetee malosi i lea fuafuaga.
Na faasiugutua ai e nisi o faipule o lea lava vaega faaupufai ona o se tetee na molimauina sa lagolagoina e nisi o faipule o lea lava vaega faaupufai lea na taunuu lava ina ua faamavae isi sui faipule e toalua, ae sa tumau lava le lagolago a Joe Keil i le HRPP e ui i lona tetee i le suiga o le itu auala.
O le faailoa o lana lagolago i le sui faaolioli o se tamaitai o Sina R Lima, atonu o se ata manino lea o le naunau o le alii faipule e tatala se isi avanoa lelei e tauva ai nisi o sui tamaitai i nofoa e lua o le au palota taitoatasi.
O loo loma nei le faamasinoga o loo tagi ai le alii faipule faasaga i le Malo o Amerika ona o le lokaina ma le taofia o ia e aunoa ma se mafuaaga tatau.
O loo taumafai loia a le Malo Amerika i le Setete o Missouri e soloia ma faaleaogā lea tagi a le faipule e faitau miliona tupe Amerika o loo finau Joe e totogi atu e le Malo Meleke ona o le gaioiga na faia ia te ia ae e lei taunuu ona suesueina ona moliaga sa molia ai.
