E lua ni nofoaga e faatau ai oloa poo poloka o oloa o loo i Fugalei, ua faapea ona tapunia ona o ni faafitauli ua tulai mai ai ni feeseeseaiga i totonu o le Maketi.
O le telē o le lisi o le aufaatalitali ua foliga mai ua fai ai lava nisi o feutagaiga a i latou ua iai faleoloa ma i latou ua iai poloka ma ua ave ai isi vaega o o latou faleoloa ma poloka i nisi o le atunuu.
O ni feutagaiga ua faia e aunoa ma se faatagaga poo se faamaoniga mai le Faalapotopotoga o Taui o Faalavelave Faafuasei.
A tulai mai ai la nisi o faafitauli i feutagaiga nei a le au faifaleoloa ma le au faipoloka ma tagata ua o latou ave i ai le ‘afa o o latou nofoaga i le Maketi, e toe foi atu lava i le Pulega o le ACC, ma o lea la ua agai mai nei le Faalapotopotoga e aveesea nisi ua tulai mai ai feeseeseaiga.
O se tasi o mataupu ua oo i le faamasinoga ona o se tamaitai na ave i ai le avanoa e se tasi o tina e faatau ai ana foi oloa i se feutagaiga i le va ma lea tina, peitai ua tulai mai ai ni faaletonu ma ua faapea ona feeseeseai ai ma nisi foi o tagata faatau oloa i totonu lava o le maketi.
O le faafitauli, talu ai ua toalua ua fai i ai feutagaiga a le tina lea, ma ua vevesi ai loa le au faipoloka e toalua ae o le toalua ia, e lē o lesitala i le lisi lea e faia ma le Pulega o le Maketi.
Ua aveese uma ma le tina na lesitala ai le poloka ona o nei feeseeseaiga ae ua tolopo i le faaiuga o le masina le mataupu ua ave ai se tasi o le toalua na vevesi i le Faamasinoga. Tutuli ese faatau oloa savali i nofoaga faatali pasi.
O lea ua faalauiloa se isi lapataiga a le Faalapotopotoga o Taui o Faalavelave Faafuasei, lea e pulea le Maketi i Fugalei, e matuā tapu ai soo se faatau oloa ona toe faatau a latou oloa i le nofoaga o loo faatali ai pasi i lea nofoaga.
O le faamatalaga a le Alii Pule i lipoti o le vaiaso na tea nei ua tele taumafaiga e aveese ai nei tagata e toe foi ane lava i nofoaga ua fausia mo tagata lautele e fia faatali o latou auala, ae ua tele faitioga i le agai ane pea o nei tagata. O lea foi la ua faalauiloa lapataiga i ia nofoaga.
E faapea foi nofoaga faatali pasi i le Maketi o lavalava ma taumafa i Savalalo, ua vaaia ai foi tagata e faatau savali a latou taumafa vela ua faaaogā foi nofoaga faatali pasi auā a latou atina’e.
O le faamatalaga a le Ofisa Sili o le Faalapotopotoga o taui o faalavelave faafuasei, le ACC, Malaeulu Lose Niumata, o tagata nei e lē o lesitala o ni faifaleoloa poo ni faipoloka foi i lea nofoaga, o lona uiga e faasā lava ona iai i ia nofoaga e aunoa ma le lesitala ai o a latou oloa faatau.
“E faigata lava ona vaavaai nei tagata i taimi uma o le aso e ui o lea lava e agai i ai lapataiga ma taumafai e tutuli ese ma nofoaga nei,” o le faamatalaga lea a Malaeulu. Ua iu lava foi ina faaleo ai le lē fiafia o le toatele ona o le lē maua ai o le avanoa e faatali pasi i nofoaga na fausia i Fugalei ona ua tulei ese le toatele e le au faatau oloa ia.
Ua faapea foi ona iai se isi nofoaga i totonu lava o le vaega o loo faatau ai taumafa vela ua aveese foi se isi faatau oloa ona o ni feeseeseaiga na tulai mai ai.
“O le faatonuga na oo atu ona ua agai lava ina lē mafai ona maua se filemu i le va o tagata nei, ma e faateia i le oo mai o faitioga e faatatau ia i latou ua fai faatasi a latou feutagaiga e aunoa ma le iloa e le Ofisa, ma o lea la ua faatonu nei le Faalapotopotoga e aveese tagata nei,” o se faamatalaga lea a le alii pule.
O loo malamalama lava le alii pule i le faatuputupulaia o le manaoga o le atunuu i ni avanoa, ma e fiu foi e fautuaina le agai i le maketi fou i Vaitele, ae e faigata tele ona o loo iloa lava e le au faioloa le nofoaga o loo tumutumu ai le atunuu.
O lea ua iai fuafuaga a le ACC ina ia toe tala atoa i lalo le nofoaga lea e i Fugalei, ona o le a toe fausia atoa lea Maketi atoa ai nofoaga i autafa ane. Ua iai foi fuafuaga mamao e faatau ai ni fanua tuaoi o le Maketi ina ia faalautele atili lea nofoaga, ona tatala loa lea o le avanoa mo le silia i le to’a 200 o loo i le lisi faatalitali, e lesitala ma umia a latou lava poloka i le Maketi i Fugalei.
Ae o le taimi nei, ua taumafai nei le Faalapotopotoga e lapataia ma faamalosia loa le aveese o i latou o loo faioloa i nei nofoaga ae e lē o lesitalaina.
