O se tulaga uigaese ma le mataina i le tele o auala ma metotia e tatai maia le tele o tupulaga o loo lalovaoa, e le gata o Samoa ae sili ai le tele o papalagi na vaaia i lea po.
E lei manumanu le Peresitene ia Ps Anthony Mauinatu ma le taitai autalavou ia Tane Lokeni i ni tupe faaalu ae na silasila mamao i le soifua o tupulaga lea na molimauina le toatele o talavou na talia le valaau faapitoa.
E 14 ausiva na tauva i le polokalame o le Hip-Hop Dance Competition ua leva ona fuafuaina ma e ova atu i le 500 tupulaga talavou na auai, ma na matuai faigata ona faia le galuega a faamasino i le mataalia o ausiva taitasi.
Na faia lea tauvaga tele i le poo le Aso Faraile aso lona lua o le masina o Novema. O le guest speaker mai Samoa le susuga ia Ps Siāgigi Vaafusuaga na lauga faapitoa e pei ona malaga mai ai ma le faletua ia Filomena.
O faamasino o le tauvaga o le Susuga ia Faamatuainu Vaaaoao Alofipo, Filomena Vaafusuaga mai Samoa, Edward Tafa, Matt ma Gavett.
O le tulaga muamua na faamanuiaina ai le Ausiva a le State of Play i le toluafe limaselau tala ($3,500) ma le ipu, tulaga lua le Runaway e $2,500 ma le ipu ma le tu tolu o le Vaydem e $1,500 tofu ma le ipu.
O isi ausiva uma na tauaaoina le ta’i $150.00 ma nisi meaalofa, faatasi ai ma le tele o vouchers sa ave fua e tau ala mai i le kamupani telefoni a le Digicel.
Ua alo atu nei le Ekalesia a le Harvest Worship Centre i se isi laasaga e saga faatuputupulaia ai pea le fiafia o tupulaga e vivii i le Alii ma o se tasi lea o Ekalesia e vaaia le tele o a latou faagaioiga ua saga faamausaliina ai le fiafia o talavou.
O le isi fuafuaga o loo talia se latou polokalame faaleautalavou i luga o le alaleo a le Penina o Asuisui ma e momoli foi le agaga faafetai i le Taitai autalavou ia Tane faapea le susuga i le Peresitene ona o le magafagafa i metotia e faafiafia ai le autalavou ina ia mulimulitai pea i faavae ma tumau i le Atua.
