O le agai atu o Samoa i le faamanatuina o le Kirisimasi o lenei tausaga, ua amata foi ona vaaia le toatele o tagata asiasi mai, aemaise lava aiga ua i Samoa mo mafutaga faaletausaga a le aiga.
O le tumutumu lea ua amata ona vaaia ai le toatele o le atunuu i le taulaga i aso uma ma ua faamalosia nei foi le galuega a le Ofisa o Leoleo, e tutuli ese ai tagata faatau fualaau aina, meamata ma isi oloa i luma o faleoloa.
O le alii tauaso o Vaa o loo faatau nusipepa, pepa lūlū ma isi lomiga i luma o le Faleoloa o Amau ua silia i le lima tausaga o faamautu ai lea pisinisi ua ia faia i luma o le Faleoloa i Matafele.
“O le Aso Lulu na amata omai ai leoleo, e laiti alii ma na amata lava ona tutuli ese tagata ia ua fai laulau e faatau ai a latou fualaau faisua i luma o le Faletupe.
Na faasolo mai ai loa i luma o Amau ma tutuli uma ese loa matou. Ua ou fiu lava la e fai atu i ai o a‘u ua uma ona aumai le faatagaga a Amau e faatau ai a‘u oloa i luma o le latou faleoloa, ae fai mai lava Leoleo e tapena ese la‘u laulau ma ou alu ese,” o se faamatalaga lea a Vaa ina ua vili mai i le tatou ofisa i Saleufi mo se fesoasoani.
“O le aveese o tagata nei ona ua tele faitioga ua oo mai i le Ofisa o Leoleo i le toatele o tagata ia ua la‘u atu a latou fualaau faisua, tutuli tamaiti e faatau tauaga, koko Samoa ma isi mau oloa i luma o faleoloa ma faigata ai e le tagata faatau ma tagata o loo feoai i luma o faleoloa i aso taitasi,” o se faamatalaga lea a le Afioga Leaupepe Fatu Pula le sui sooupu o le Matagaluega o Leoleo.
E lua aso o fai le galuega a leoleo i le taulaga o Apia e tutuli ese ai tagata faatau nei ua tele ina i luma o Amau, le faletupe o le ANZ ma le NPF.
O le faafitauli la ua aafia atu ai ma le au faatau nusipepa, faatau lavalava ma isi faatau oloa ua tele tausaga o iai i luma o fale nei.
O le mae‘a ai o talanoaga ma le matagaluega, na toe faatonu ai Malu o le Malo e tuu ai pea i latou ia ua tele tausaga o faatau oloa i luga o laulau auā e lē o faalavelave i le auala.
O isi kamupani o loo faamautu ai o latou ofisa i totonu o fale ia, o loo mafai lava ona faatau a latou oloa i fafo ae o isi uma tagata o loo faasavali oloa e pei o fua o fualaau aina ma fualaau faisua, o i latou tonu ia ua faasagasaga leoleo e faasā ma nei nofoaga faitele.
O loo mautu lava le Nofoaga mo fua o faaeleeleaga, le Maketi lea i Fugalei. Ae ui i lea Maketi, o lea lava o loo tele nofoaga o le taulaga ua faatau ai fua o faaeleeleaga ma o le isi lea mafuaaga o le taumafai o leoleo e faataape le toatele ua tumutumu ai nofoaga faitele nei.
O pisinisi ia ua mafai ona nonofo pea ma faatau a latou oloa i luma o faleoloa ma Ofisa tele i le taulaga, o i latou ia ua mafai ona maua faatagaga mai i kamupani e pei o Amau e faatau ai a latou oloa i luma o ia fale.
O le faafitauli tele lava lea ua vaaia nei ona o le soloatoa o faiga a i latou nei o loo faatauina soo se oloa i le taulaga, ma o nisi ua matauina e lē o iai ni laisene e faatino ai pisinisi, leai ni poloka o totogi i le maketi i Fugalei poo Savalalo foi ae ua na ona faasavali solo o oloa.
O le isi foi la lea galuega ua faatautaia nei e le Matagaluega o Leoleo, i le faataape ai o tagata nei ua faasavali solo le faatauga o a latou oloa.
