“E fesoasoani ai i aiga ona o mafatiaga mai le afā o Eveni”
O se faamanuiaga ua faalogoina ai le leo o le fiafia i le toatele o le au fai saofaga o loo feagai nei ma le totogiina o pili o fanau aoga mo le kuata muamua o aoaoga o lenei tausaga e pei ona toe a‘e aoga i le atunuu. “Se mea lelei tele le faaiuga ua faia e le Malo auā ua maua ai se fesoasoani mo ma‘ua i pili o la‘u fanau”, o le lagona lea o le tamā o Reupena mai Fusi Safotulafai sa fesiligia ina ua faailoa le 4 pasene.
“O a‘u ia o le faafetai lava i le Malo ma le NPF auā ua fetaui foi le uma atu o le afā ma le tafa o se finagalo e aumai se seleni mo matou le au fai saofaga”, se finagalo o se tasi o tina na tau atu le tusitala o saofai i nofoa e faasolo ai le au fai saofaga e fai a latou nonogatupe poo loan i le NPF.
$16 miliona e faaalu i le 4 pasene
E fuafua le seleni e maua e le tagata fai saofaga mai le 4 pasene i le aofaiga o lana tupe o loo iai i le NPF. O le faamalamalamaga lea a se ofisa sinia o le faaputugatupe.
O le totogiina atu o lea faamanuiaga o le a faaalu ai e le NPF se vaegatupe e tusa ma le sefuluono miliona tala. O se vaegatupe ua faaalia e le pulega o le faalapotopotoga e lē gata ina maua ai se fesoasoani mo tagata ua mafatia i le afā, ae o le a toe sasaa atu lea tupe tele i le tamaoaiga o le atunuu e toe faaleleia ai.
O le tuanai o le sunami ia Setema o le tausaga e 2009, tusa ma le tolu tausaga ua mavae na totogi atu ai foi e le faalapotopotoga se faamanuiaga mo tagata fai safofaga. O le mafuaaga lava lea e tasi, o le fesoasoani i aiga o tagata fai saofaga na aafia i lea mala faalenatura.
Ua faailoa e le NPF o tagata uma e tatau ona oo atu i totonu o le fā vaiaso e tala a latou tupe, ae o tagata e le ausia le taimi ua tapulaa ai le talaina o le fā pasene, o le a ave loa a latou seleni i totonu o a latou saofaga.
O le au fai saofaga e na o le ta‘i $1,250 seleni o loo i totonu o le faaputugatupe e lē mafai ona talaina i tua ae tuusa‘o i totonu o a latou saofaga, ma e mafai ona nono mai ai. O le ofisa autū i Apia, le ofisa i Vaitele ma le ofisa o le NPF i Savaii o le a faatino ai le totogiina o le faamanuiaga.
