“Ou te leiloa poo fea e oso mai ai se palota laititi”
Ua faailoa lautele e le Lesitala sinia o faamasinoga o ia foi o le faauluuluga o lea matagaluega le tofa Masinalupe Tusipa, e lei soloia le suafa matai o Tuia Paepae Letoa, le tasi o faipule o le itumalo o Safata e pei ona lipotia le faaono faia o se palota laitiiti a lea itumalo e mafua i se faaiuga a le faamasinoga o talosaga apili ua faaleaoga ai le faaiuga na filifilia ai Tuia Paepae e tauaveina le suafa matai faatasi ai ma se isi suli o le suafa Tuia o Vaiee Safata. O le faaaliga a le ofisa sili o le matagaluega o faamasinoga na faia i le Aso Lulu, 20 o Me 2009, ina ua ia faatoa maua le faaiuga tusitusia a le faamasinoga o talosaga apili.
O le faamaninoga mai o lea tulaga o le a lē faia se palota laititi e pei ona sa lipotia muamua. O finauga i le suafa Tuia ua faatonuina e toe faia i le aso 19 o Novema o le tausaga nei, o le a iloa ai se isi faaiuga e taunuu i ai le mataupu i le soloia ma le faaauau ona tauave e i laua na tofia o le suafa. Faaalia e le tofa Masinalupe ua le mafai ona faia se faaiuga i le soloia o nofo ona ua maea ona lesitala faaletulafono, ae sei vagana o se faaiuga mai le faamasinoga o le a toe fofogaina i le masina o Novema.
“Ona o le matau a le afioga i le Peresitene o loo iai se tasi o alii faamasino sa tauaaoina le mataupu e iai sona sootaga i se tasi o itu, ua manatu ai le afioga i le peresitene e toe ave le mataupu e toe iloiloina e le faamasinoga maualalo (Lands and Titles Court), ae le o iai se finagalo o le peresitene a mea faapea o le a faaleaogaina le faaiuga”, o le finagalo lea o Masinalupe. “O le tulaga lava la o loo iai nei, ona o le matai ua uma ona lesitala e tumau pea ona lesitalaina le matai. Mo le silafia foi e le atunuu vagana ua iai se poloaiga a le faamasinoga a mea ua soloia le matai mai le tusi lesitala o matai, ona faatoa faataunuuina lea”, na saunoa ai lava le ofisa sili o le Matagaluega o Faamasinoga.
I se finagalo o le alii faipule le afioga Tuia Paepae Logoiai Letoa na faaalia i se lipoti a se tasi o faletelevise na ia teena ai ni lipoti i le faia o se palota laitiiti. “Ou te leiloa poo fea e oso mai ai se palota laititi, afai lava e leai se faaiuga a le faamasinoga e tusa ai ma lea tulaga, ou te lagona e leai se palota laitiiti”, na saunoa ai le alii faipule. “Ua tele le afaina o lo‘u aiga, o lo‘u nuu ma lo‘u itumalo aemaise lava i le paia o le aufaigaluega, aemaise lava i le susu a le toeaina le susuga Kereta ma le faletua faapea foi le afio o le Tama a le Fale ia Teo ma Tuia o le matua ma le Usoalii faapea foi le tapuaiga mamalu a le itumalo. O loo tumau le tofi o le tatou itumalo e leai se mea e faapopleina ai”, na toe saunoa ai Tuia Paepae.
O le alii faipule sa tauva i le palota tele i lalo o le tagavai a le vaega faaupufai o le SDUP ma manumalo ai. Peitai ina ua vevesi le lotoifale o le pati ma faamavae ai nisi sui faipule e aofia ai le taitai, na le toe maua le numera e aloaia ai lea vaega faaupufai i le palemene ma avea ai faipule o le SDUP ma sui tutoatasi. Peitai o taumafaiga e maua se faatasiga o faipule o loo agaia le Malo i lalo o se isi vaega faaupufai fou na taulamua ai Tuia Paepae i le faatuina o le Tautua Samoa, le pati na toe faamavae mai ai a o lei faalauiloaina faalauaitele lea vaega faaupufai.
