Faalauiloaina o le Lunch-Box a Ola

O le masina o Aperila i le tausaga talu ai 2008 na amata faagaioia ai le pueina o le ata o le “OLA’S HEALTHY LUNCH_BOX” mo le faamoemoe lea i le faia o le (resource) poo se DVD e faasalalau atu ai le taua ma le aoga tele o le tatau ona mataalia matua ma tagata lautele i totonu o aoga mo le faatauaina o le taumafaina e fanau laiti o meaai fetaui ma talafeagai mo le soifua maloloina lelei o le fanau mai lava i le faatoa fanau mai (tulou) seia oo lava ina avea ma tagata matutua.
O le Aso Lulu la o le vaiaso na mavae atu nei na faataunuuina ai loa le faapaiaina ma le faalauiolaina o le DVD lea i le aoga a St Peter Chanel Preschool aua o alo lava ma fanau i totonu o le aoga lea sa faataunuuina ai lea polokalame. O le “STAR” o le polokalame “OLA’S HEALTHY LUNCH-BOX” le tama o Joseph Matautia ua agai atu nei i le aoga tulagalua sa mataitu lava i ai le faagasologa o le pueina o ata mo lenei polokalame matagofie tele. O le autu tonu ma le manatu maualuga o lenei DVD, ia oo atu i aoga amata uma o le Pasefika ma tau atu ai se feau taua ina ia fai ma fesoasoani ma faamanatu sili mo le tapenaga o meaai a le fanau i aso uma, poo le pusa meaai mo le aoga poo le tapenapenaga foi i le fale lava.
O le isi lenei faamanatu sili ona agia soo ma faafofoga pea i ai o tatou tagata e le gata i nusipepa, o leitio, televise ae ua faapena foi i le tele o matagaluega e iai aoga ae maise lava i le ofisa o le soifua maloloina. Talu mai lava le tausaga 2006 na faatoa avea ai le Aoga a St Peter Chanel Preschool ma se tasi o aoga e faatauaina ma faamamafaina ai le aai o tamaiti uma i meaai paleni ma talafeagai, ua vaaia lava le lagolago malosi o matua ma latou faatauaina ai lava lea polokalame. O se mitamitaga sili lea aua e le gata ina ua mautinoa le mafai ona sefe ai o ni nai tupe mai le soona faatau o meaai le talafeagai, ae ua avea foi ma faataitaiga lelei tele mo tamaiti ma faamasani ai lava i le aai i meaai paleni lelei i aso uma.
O le Afioga lava ia Peter Brown, sa ia faapaiaina le DVD i se sauniga faapitoa na amataina ai lea faamoemoe mo le faalauiloaina o le DVD, ona faaiu foi lea i se taumafataga na saunia lelei e le matagaluega o le Soifua Maloloina i Manukau (Kailelei). O le tamaitai o Tai Faalogo o le sui o le matagaluega o le soifua maloloina i Manukau sa fai lava ma fesootaiga maumaututu o lenei polokalame mai lona amataina seia iu lava ina ua faaiuina nei.