O le aso 24 o Iuni o le tausaga e 2005 na fofogaina ai le faaiuga a le Faamasinoga o Fanua ma Suafa i Mulinuu, na faatonuina ai le taofia o le galuega o le Malumalu o se ekalesia i Toamua ma ave le 6 masina e tala ai i lalo le falesa.
O le fanua o loo fausia ai le malumalu e aiā tutusa i ai le suafa Ale i itu paepae o Tuamasaga ma Lutiala, o le mafuaaga lea o le tagi na faaulu e Ale Vena faasaga ia Ale Nofoaiga ina ua amata fausia le falesa i se vaitaimi o le tausaga e 2004. O le faaiuga a le Faamasinoga o Fanua ma Suafa e lei talia e le itu na faasaga i ai le tagi ma faapea ona faato‘ai ai se talosaga ina ia toe iloilo ma suesue le faaiuga e le faamasinoga o talosaga apili (Land & Titles Court of Appeal).
Na teena e lea faamasinoga le talosaga apili ma faatumauina ai pea le iuga a le faamasinoga maualalo na fofogaina ia Iuni o le tausaga e 2005 o le talaina i lalo o le falesa. Peitai na toe faaulu se talosaga a Ale Nofoaiga ma lana itu i le Faamasinoga Maualuga (Supreme Court) ina ia faia se iloiloga faaletulafono i vaega o le faaiuga a le faamasinoga apili ona sa teena e lana itu.
O le ofisa o le Loia Sili a le Malo na finauina se talosaga poo se motion e faalēaogā lea iloiloga lea e ta‘ua o le strike out motion ona e sese ma lē sa‘o mau ua faavae ai le talosaga a le itu tagi faasaga i le Peresitene ma le faamasinoga o talosaga apili.
O le aso 14 o Iulai o le tausaga e 2008 na faia ai le faaiuga a le Faamasino Sili i le talosaga mo se iloiloga, ae aso 29 o le masina lava o Iulai o le tausaga lea na faato‘ā faailoa ai le faaiuga tusitusia lea ua talia na talia ai le talosaga a le Loia Sili e faalēaogā le talosaga a le itu tagi mo se iloiloga faaletulafono.
O lona uiga ua faatumauina lava le faaiuga a le Faamasinoga Maualalo ma le Faamasinoga o Talosaga Apili e tuu i lalo le malumalu. Talu mai lea taimi e oo mai i le tausaga nei, ua faaalia e se matai o le afioaga ma le aiga o Ale Vena, sa olo lava le fua ma tuu avanoa pea.
Peitai o le fono a le afioaga i le Aso Toonai, 16 o Iulai 2011, na tuuina atu ai le mataupu lenei i le talaina o le malumalu i luma o le fono, ma ua lagolagoina ai le faatalauula a Ale Vena ma lona aiga, ua tatau ona faatino le finagalo o le faamasinoga ona ua asoa ma tele foi tausaga e lei faatinoina lava.
Ua faaalia e se molimau faatuatuaina e lua masina o loo fuafua e tuu avanoa ai i le ekalesia ma le aulotu e ana le falesa, e tala ai i lalo. O Ale Vena o le Sa‘o o le isi itu paepae o le suafa Ale i le fausia o le malumalu i luga o le fanua Tau Toamua ona e aiā tutusa i ai ma suli o le suafa na taulamua i le fausia o le falesa ma o i latou foi e ana le lotu.
