I le va o pati e tolu, Faifeau EFKS Sapapalii, le tamalii Samoa faipisinisi o loo tuua‘ia, ma le alii papalagi Niu Sila faipisinisi
O se tasi o tamalii faipisinisi Samoa, o loo lipotia sa ia ofoina nofoa mo le malumalu o le ekalesia EFKS i Sapapalii i Savaii, peitai mulimuli ane na lē faamalieina manaoga tau tupe o le kamupani sa fausiaina nofoa, atoa ai ma le momoliina i Savaii. Na oo ina tapunia ai ma lea kamupani ona o le tele o le vaega tupe sa leiloa ai, ona o le galuega sa faia, ae ua lē totogia.
O lipoti ma se suesuega sa faia e le Samoa Times agai i le sa‘o ma le fia mautinoa o lea mataupu, sa taumafai ai e fesootai ia i latou uma e iai fesootaiga agai i le faafitauli. O le faagasologa o le suesueina o le mataupu na mafua ai ona tali mai le faletua o le alii faipisinisi lea o loo faasaga i ai tuua‘iga.
O se talanoaga sa faia i luga o le telefoni ma sa ia faamaonia ai nisi o vaega o le mataupu, ae sa ia teena nisi faamatalaga e pei ona taulimaina e le samoa Times.
O le taufaaiuiu o lea talanoaga umi sa faia, na faapea mai ai le faletua, o le a malaga mai lona alii i Aukilani mo se feiloaiga ma talanoa atili ai i le mataupu. Peitai e lei faataunuuina lea tonu ma lea fuafuaga e pei ona malilie i ai le Samoa Times ma le faletua, ina ua lē maua se feiloaiga ma le tamā.
Sa toe fesootai i ai le Samoa Times mulimuli ane mo le toe faamautuina o se isi avanoa, peitai e oo mai i le taimi na lomia ai lenei lipoti, e lei toe fesootai mai lava. Ae sa faia ma faaauau pea ni fesootaiga agai i Samoa, ma tāpā ai se finagalo o le susuga i le faafeagaiga o loo tausia le galuega i le afioaga i Sapapalii.
Sa toe feiloai foi ma le alii papalagi Niu Sila faipisinisi, o ia lea sa fausia nofoa i lana kamupani faatasi ai ma le momoliina i Samoa, ma o ia foi lea sa uluai mapuna a‘e ai lenei mataupu. Ua mae‘a ona faia suesuega ma talanoaga i vaega e tolu, poo pati e tolu o loo aafia i le mataupu.
Na pau le tulaga e lei toe faamautuina mai, sa iai nisi o maliliega sa faia i le va o le faipisinisi Samoa, ma le faipisinisi papalagi mulimuli mo le amataina o ni peimeni mo le togitogiina o le aitalafu.
Alii faipisinisi Niu Sila
Sa toe taofia e le alii papalagi le faia o se isi faamatalaga i luga o le nusipepa, ona o loo ua taoto i lima o loia le mataupu. O se fautuaga foi mai lana loia ia aua ne‘i toe talanoaina ma faia se isi faasalalauga. Peitai o le manatu ina ia malamalama lelei le mataupu mai ona itu e tolu, o le ala lea ua manatu ai e tatau pea ona lomia nisi o talanoaga sa faia muamua, a o lei oo le mataupu i loia.
E tusa ai ma se faamatalaga sa faamatuuina mai e le alii papalagi sa feagai ma le galuega tele o le fausia o nofoa, sa ia ta‘ua ai lona lē fiafia tele ona o le tulaga ua oo i ai le maliliega sa faia muamua ma le tamalii Samoa.
E silia ma le $200,000 se vaega tupe o loo aitalafu ai le fausia o nofoa o le malumalu, ae peitai o loo agai pea i luga ma toe faaopoopo nisi afe se tele, ona o le tuai ma ua lē tausisia le feagaiga sa faia muamua ma malilie i ai itu e lua mo le totogiina o le galuega.
Sa faamaonia mai e le alii palagi e faapea, ua tapunia lana kamupani, e lē gata i lea, ua faatau ese le tele o aseta e pei o taavale, masini ma isi meatotino, toe faatau ese ma se isi ona fale faatau, ona o le totogiina o isi foi kamupani sa sapalaia le tele o meafaitino (supplier) mo le galuega.
O le mau faafitauli ma mafatiaga ua feagai nei ma lea alii faipisinisi, sa ia ta‘ua ua mafua ona o le lē faamaoni o le tamalii Samoa sa latou feutagai.
Saunoa lea alii, ua oo lava foi i lona soifua maloloina, ua matuā aafia lava, e mafua ona o le popole ma le atuatuvale i le tulaga ua oo i ai lana kamupani ma lona taumafai i le tulaga o pisinisi. O le aveesea o le tele o ana meatotino o se isi mafuaaga tele o lona tau faaletonu.
Sa ia faamaonia o loo ua sauni atu mo ni taotoga faapitoa ona o aafiaga o lona soifua maloloina talu mai lenei faafitauli.
Na oo lava ina malaga le alii faipsinisi Niu Sila, ina ia toe finauina le toe faafoi mai o nofoa, ina ua lē mae‘a ona totogi, ma ua leai foi se fesootaiga na toe maua ma le tamalii Samoa.
Na taua foi e le alii Niu Sila, sa talileleia lana taunuu atu i Samoa, ma sa fesoasoani ane le ekalesia ma le afioaga ma totogi an e ai se vaega tupe e tusa ma le $50,000 Samoa.
E tusa ma le $27,000 Niu Sila sa maua ai, ma na o le pau lea o le tupe ua totogi agai i le tau o le galuega atoa e pei ona ta‘ua muamua, e silia ma le $200,000.
Faifeau EFKS Sapapalii
O se feau tusitusia sa tuuina mai i luga o upega o fesootaiga, sa faailoa mai ai se lagona faanoanoa o le susuga i le Faifeau, ona e faapea ua mae‘a ona faia se talanoaga ma le alii faipisinisi Niu Sila, ina ia aua ne‘i toe aafia fua le igoa o le ekalesia ma le afioaga i se isi faasalalauga. Peitai o le toe fesootai atu i ai a le Samoa Times, na faateia ai ma iloa lē toe alia‘e o lea mataupu.
O se finagalo o le Faifeau tauala mai i lea lava feau, sa ia toe tatalo ai ina ia taofia le toe taua o le igoa o le ekalesia ma le afioaga.
Ae ia tulituliloa pea ma ta‘u le igoa o lē o loo faasaga i ai le mataupu, auā o ia e tatau ona tuliloaina pea.
Sa faamaonia foi mai Samoa e le susuga i le Faifeau, ua mae‘a ona totogi i le alii Niu Sila, le tupe e tusa ma le $50,000 Samoa, e tauia ai le malaga atu i Samoa o lea alii ma lona faafitauli.
E ui e lei iloa ma silafia e le Faifeau ma le afioaga ni maliliega ma tuutuuga i le va o alii faipinisi e toalua i le fausia ma le ofoina o nofoa, peitai sa malilie le ekalesia, ina ia totogi le tino i tupe e pei ona ta‘ua. E pei ona silafia o loo ta‘ua i luga i le faamatalaga a le alii Niu Sila, le vaega tupe e pei ona faamaonia mai e le susuga i le Faifeau ma lona faletua i Samoa.
O le taimi foi lea sa faia ai ma se maliliega i upu, ina ia tulituliloa pea le tamalii Samoa sa ia ofoina ma faatonuina le galuega e faia atoa ai ma le totogi e aunoa ma le toe aveina fua o le igoa o le afioaga, ma le ekalesia, faapea le suafa o le Faafeagaia taulagi a le afioaga.
Fai pisinisi Samoa, tamalii Samoa
E lei oo ona malaga mai le tamalii Samoa, lē o loo faasaga i ai tuua‘iga mo le totogiina o nofoa o le malumalu i Samoa. E lei toe maua mai foi se fesootaiga talu ona lē taunuu le feiloaiga sa tuutala ai muamua ma le faletua o le alii faipisinisi.
Ae o se tala mai le faletua i se talanoaga sa faia muamua, sa ia ta‘ua ai, se vaega tupe sa la totogia agai i le alii papalagi o loo faaseā nei, e fai ma tiposi ma amata ai le galuega o le fausia o nofoa.
E tusa ma le $60,000 lea vaega tupe sa totogi ma le faamoemoe lava sa iai, e faaauau pea ona totogi le tau atoa o le galuega, i auala sa malilie faatasi i ai ma le kamupani.
Peitai o le faaletonu o le tamaoaiga o le lalolagi, ma sa aafia tele ai a laua foi taumafaiga ma pisinisi o loo faagaioia, ua lē gafatia ai ma ua faaletonu ai le totogiina o le aitalafu.
Sa ia ta‘ua foi sa iai lava nisi o maliliega sa toe faia mulimuli ane ma le pule o le kamupani, ma sa faailoa foi i ai le tulaga leaga o pisinisi ma ana tupe maua. Peitai ua lē fiafia tele ona o le faasalalauina faalauaitele e le alii papalagi o le mataupu.
Faasalalaluga faalauaitele
Atonu o se ata manino lena o loo ua iai lea mataupu mo le silafia e le atunuu. Ae o le vaiaso na tea nei sa faapea foi ona toe maua mai ai nisi o faasalalauga faalauaitele mai se tasi o ofisa e aoina aitalafu tagata lautele.
O lea faasalalauga e faasaga lava foi i le tamalii ma lona faletua e pei ona ta‘ua i le mataupu o loo lipotia. O se manatu sa faaali e lea ofisa, sa lapataia ai le tagata lautele ina ia mataala ma ia vaai toto‘a i suafa o le ulugalii sa ta‘ua ai.
O lea lava faasilasilaga faalauaitele, o loo faailoa ai foi nisi o pisinisi o loo faagaioia e le tamalii lava lea ma lona faletua.
E lē gata i lea, ae o loo ta‘ua ai foi le tele o aitalafu o loo taumafai e aoina ma tuliloa suafa o loo ta‘ua. E foliga ua matuā lē mafai lava ona taofiofi lea kamupani, ona ua fiu e sue ma tau saili e ala i fesootaiga sa masani ai.
Ua mafua ai ona faalauiloa lea mataupu mo se lapataiga ma se fautuaga mo soo se tasi e fia fai paaga ma silafia lea tamalii Samoa, ma le tina o loo ta‘ua uma suafa i lea lipoti.
