O le aso e tulai ai i luma o le faamasinoga maualuga se alii na faapea ona faafoi mai i Amerika i le mae‘a o le tausaga o sola i fafo a o faagasolo suesuega ia te ia. O lea alii e suafa ia Vaiauga Leatuavao sa galue o se faiaoga o le gagana gūgū i le faalapotopotoga o le SENESE i totonu o Samoa. O se faalapotopotoga lenei ua unaia aoaoga e faatatau i fanau e iai manaoga faapitoa aemaise lava ia i latou e logonoa. O moliaga uma ua faia faasaga ia Leatuavao, ua aafia ai ni teine aoga se toafā o lea nofoaga ma e toatele lava teine ma tama logonoa e aooga ai i lea aoga.
O le feaveaiga o fanau aoga nei mai i le aoga a le SENESE agai mai i aoga o mafutaga faale tusi paia i le Ekalesia Porotesano i le tausaga e 2006 lea na ta‘ua e lipoti a leoleo na tulai mai ai faiga a lenei alii ua aofia ai le faamalosia o teine aoga e tusa ma le 40 moliaga, o le fai o sauaga matagā, o le faia o uiga faasotoma, o le tau faamata‘u, taumafai e faamalosi nei teineiti, o moliaga uma nei ua faia faasaga i lenei alii.
O se faatalatalanoaga na faia lava i se mafutaga a teine aoga ma faiaoga na ta‘u ai e se tasi o teine e toafā nei le amioga o loo faia e Leatuavao ia i latou. Na amata ai loa suesuega a le SENESE i le mataupu. Na mulimuli ane ave le mataupu i leoleo peitai a o faagasolo suesuega ma maua ai ua alu i Amerika lenei alii ma laga ai foi faitioga ona o le mafai ona alu ese ae e tele moliaga nei ua faia faasaga i lenei alii.
O lea la na logo ai i fesootaiga a le ofisa o Leoleo i Samoa nei leoleo i Amerika ae maua mai ai i Seattle lea alii peitai na umi foi ni feuiaiga pe faafefea ona toe faafoi mai ona o le umi o le faigamalaga ma le tupe e alu ai ae o lea la ua faamalosia le toe faafoi mai auā ua ova aso ua nofo ai i Amerika ae na o le ono masina le pemita na mafai ona malaga ai i fafo.
O lenei alii sa nofo i le fale o le faafeagaiga o le Ekalesia Porotesano ma na fesiligia le tamaitai ia Donna Lene na faapea ona faauluulu i ai lenei aoga i le taimi na tulai mai ai nei faiga faasolitulafono, ae ia ta‘ua ai o lea na fai lava le tiute o le aoga e logo i leoleo le mataupu ina ua alia‘e mai auā e leai se tasi sa iai se manatu o tutupu nei faiga faapea, ma ana lē faatalatalanoa nei tamaitai i le latou mafutaga e lē ta‘u uma atu e le toafā ua aafia lenei tulaga.
O le mau a teineiti na matuā faamata‘u i latou pe afai e ta‘u i se isi gaioiga a lenei alii na fai. E lei faia se tali a Leatuavao i nei moliaga ona o lea na taofia lava talu ona faafoi mai i Amerika ma o le vaiaso la lenei e tulai ai e tali i nei moliaga ua faia faasaga ia te ia.
