O le mae‘a ai o le sinoti a le ekalesia Metotisi Samoa i Niu Sila ia Iuni i le tausaga nei na pasia ai se iugafono o le a vaeluaina le sinoti i ni itu se lua ona ua toatele, Aukilani i Sasae ma Aukilani i Sisifo, ae sa faatalitali i le koneferenisi mo le pasia aloaiina o lenei iuga fono. Ua maea nei le koneferenisi aoao i vaiaso muamua e lua o Iulai ma ua talia aloaia ai le manaoga na tuuina atu e le sinoti a Niu Sila, ma le iuga e faaigoa sinoti e lua ia Aukilani i Matu ma Aukilani i Saute.
O le Aso Toonai ua mavae 2 o Aukuso na faia ai loa se mafutaga tuufaatasi a ekalesia Metotisi Samoa uma i Aukilani i le maota o le afioga i le sea ia Rev Masunu Utumapu i Manukau e faamavae atu ai i susuga i faafeagaiga o le a siitia i isi matagaluega i fafo atu o Aukilani faatasi ai ma le vaeluaina o le sinoti. O le afioga lava i le Sea ia Masunu Utumapu na taitaia le sauniga faatasi ai ma le lagolagosua a le susuga i le faafeagaiga ia Oianatai Tuivanu Matale lea sa avea ma failautusi a le faasinoti, ae ua tofia nei ma Sea o Aukilani i Matu. Na auai uma susuga i faafeagaiga ma latou faletua faapea sui o aulotu taitasi.
O se faamavaega ma loimata maligi ona o se mafutaga ua leva, ae faafetai i le Atua i le laolao lelei ua aumai e faataunuuina ai lenei faamoemoe, auā e lei faatasi pe faalua ona tau vaelua lenei faasinoti. O le faamanatu lea ma le faailoga, o le 50 tausaga o le Iupeli Auro o le Ekalesia Metotisi Samoa, a o se faamanatu foi lea i le faasinoti a Niu Sila i Matu auā ua uma ona faamanatu lona 50 tausaga i le 22 o Mati i le tausag nei.
Na faatino tulaga masani o taumavaega, ona sosoo ai lea ma le faamavaega ma uso a faigaluega o le a siitia, ae faaiu i le taumafataga a Sinoti e lua. E moni lava le upu e taaalo lava tama a o le uso, e talalua foi Tuna ma Fata ao le uso.
Ae o le agaga faafetai o le afioga i le sea ia Rev Masunu Utumapu ma le nofo a faafeagaiga i Aukilani, ua mae‘a ma le manuia le faamanatuina o le 50 tausaga o le Iupeli Auro talu ona tutoatasi le koneferenisi Metotisi a Samoa mai le Ekalesia Metotisi ma le koneferenisi i Ausetalia. Sa tapena e lenei Sinoti Niu Sila Matu le pese Samoa, o le tala auiliili lava lea o le Ekalesia a o lei tumaoti le koneferenisi ma faavaeina i le aso 14 o Me 1964.
O se taeao fou foi lea mo lenei sinoti ina ua foi mai ma le fiafia ua pasia le mau e vaeluaina le sinoti a Niu Sila i Matu, lea sa i lalo o le taitaina a le Sea ia Masunu Utumapu ma le faletua ia Senerita Utumapu, faapea ma le failautusi ia Oianatai Tuivanu ma le faletua ia Faapaia Matale.
O le sinoti a Aukilani i Matu ua filifilia ai loa Rev Oianatai Tuivanu ma le faletua ia Faapaia Matale e fai ma Sea a o le failautusi o Rev Soti Soti ma le faletua ia Uputaua Soti, ae ua toe filifilia Rev Masunu Utumapu ma le faletua ia Senerita Utumapu e fai ma Sea o le faasinoti i Aukilani i Saute, faatasi ai ma lana failautusi fou ia Rev Logopati Mataafa ma le faletua ia Lealofisa Mataafa.
O le fesuiaiga o le aufaigaluega a le Atua, ua siitia atu ai nei Rev Urima Faasii ma le faletua ia Fogavai i Futina i Amerika Samoa, Rev Ierome ma le faletua ia Malaea o le a galulue i Pitone, Rev Taele ma Suela ua siitia i Ausetalia, Rev Falesoa ma Riteta ua siitia nei i Satalo i Samoa, Rev Eteroma ma le faletua ia Lefine ua avea nei ma pule autalavou i Uelegitone, Rev Saua Matai ma Vevesi ua siitia nei i Te Atatu ma Rev Luineta Ioane ma le faletua ia Vineta ua see atu nei e avea ma pule autalavou i Kuiniselani.
A o le faafetai a le susuga ia Rev Masunu Utumapu i le Sinoti a o tasi, i le amanaia ma le toe filifilia o i laua ma le tina ia Senerita e fai ma Sea o le sinoti a Aukilani i Saute, na ia faalalolalo foi i matagaluega taitasi i ni o laua sese a o laua taitaiina le Faa-Sinoti, na ia faamanuia foi ia Rev Oianatai Tuivanu ma le faletua ia Faapaia ona o le tulaga tofi ua see atu nei i le taitaiina (Sea) o le Faasinoti a Aukilani i Matu.
Mo taaloga, ua foi mai nei le faiaoga ia Rev Tapu Malo ma le auvoli a tamaitai ma alii a Niu Sila ma ipu faaofuofu, e tulaga lua i le taamilosaga, o le taaloga kirikiti ua sola mai ai Niu Sila ma le ipu o le kapeteni lelei le afioga ia Taito Laki ae tulaga tolu lana au i le taamilosaga.
O le faafetai a le susuga ia Rev Masunu i kamupani sa latou lagolagoina le malaga, i Samoa, BNZ Bank, Pacific International Freight Travel, Ese Tatupu Funeral Services, We Account, Le Sa ma le Westpac Bank.
