Tulaga alii ma le usitai o le faitotoa va apiapi

E fiafia lava e toe faatalofa atu i le paia maualuga o si o tatou atunuu i lenei foi vaiaso. E le gata i lea o le mamalu lasilasi o le aufaitau o loo faapea ona taliaina le tautua a le tatou taiala i lea vaiaso ma lea vaiaso.
E fia faaaogaina foi lenei avanoa e molimoli ai moomoga ma faamanuiaga a le Taiala o le Vaiaso i tama uma o Samoa i le faamanatuina ai o lo latou aso faapitoa.
E talitonu sa maua se Aso Sa fiafia mo tama. Ia fesoasoani mai le Atua ma ia faafualoa le soifua auauna o tama.
O le vaiaso nei o loo faapea ona faaauau atu ai le vaega lona lua o le mataupu sa amataina i le vaiaso ua tuanai, ‘Tulaga Alii ma Usitai’.
O Iesu, e le gata o Ia o le Alii a o Ia foi o le Faaola.
O lona uiga, o Iesu ua avea nei ma alii sili i lou soifua, ua nofo tupu o ia i lou olaga.
Ua le toe pule nei i taua ia i taua, a o Keriso o loo pule ia i taua. Ua faapena foi ona ta loto malilie e usiusitai ma gauai i mea uma e finagalo ai Iesu ina ia tatou faia.
Mataio 7:13-14 “Ia outou ulu atu i le faitotoa va apiapi; aua e va tele le faitotoa, e lautele foi le ala e tau i le malaia, e toatele foi i latou o e ui atu ai. Aua e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”
O loo manino le aoaoga a le Tusi Paia, o le Alofa Tunoa ua faaolaina ai i tatou ae le ona o a tatou galuega lelei.
E le faatauina foi lo tatou auala i le lagi i ni a tatou tupe, poo se amio lelei.
E tatau lava ona tatou talia le galuega maea a Iesu i luga o le satauro. E ui lava o le faaolataga o le meaalofa, ae tatau lava ona vaaia ni suiga tetele i o tatou olaga talu ona tatou faaolaina.
Ua manatu le toatele, e tele auala tatou te sao atu ai i le malo o le Atua. Fai mai foi nisi, afai e te toaga i le lotu i Aso Sa uma, ma toaga e fai lau sefuluai ma le alofa i le faifeau, ma e amio lelei e te sao i le malo o le Atua.
Peitai ua le ogatusa lea ma le aoaoga a le Tusi Paia. O Iesu lava na fetalai: “O au nei o le ala, upu moni ma le ola, e le sao atu lava se tasi i le Tama pe a le ui mai ia te au.” Ioe Samoa, o loo manino lava le afioga a le Atua, ua na o Iesu lava le faitotoa tatou te maua ai le ola e faavavau.
O lou taliaina la o Iesu, o lau lava lea filifiliga o le a e ulu atu i le faitotoa va apiapi. Fai mai e lē toatele nisi e ui atu ai. Aisea? Aua foi e faigata, e le faigofie lou mulimuli atu ia Iesu, ona o le a suia lou olaga.
O mea uma na e fiafia e fai a o e iai i le olaga tuai, o le a lē toe faia.
O le a e oti i ou lagona ma ou manatu, ae o le a avea manatu lelei ma manatu o Iesu e te manatu ai.
O lau gagana o le a suia foi, o le a le toe gagana i le paaa ma le toilalo, ae o le a suia lau tautala i upu e fausia ai ma faamalosia ai se tasi tagata.
O le faia la o nei suiga, e le o se mea faigofie.
O le mafuaaga lena o loo faatusaina ai i le ala va apiapi, ma e le toatele nisi e fia ui ai. Ae peitai o le faitotoa e va tele, o le ala lea i le malaia, e lautele foi ma toatele i latou e ui atu ai.
Atonu e le toe tau faapupulaina lea tulaga, aua e toatele tatou o loo fiafia pea i ala o le lalolagi nei.
Ae o loo aoao mai le afioga a le Atua, o tuinanauga o le tino ma tuinanauga o mata, o le faalialiavale o lenei olaga, e le mai le Tama. A o mea nei ua maileia ai i tatou, ma ua tatou faiaina ai pea ma lē oo atu ai le viiga o le Atua.
Na maliu Iesu mo a tatou agasala ina ia tatou lelei ma le Atua le Tama. O ala la o le Atua e le tutusa ma ala o le tagata.
O ala foi o le Atua e le faigofie, o le mea foi lea e le taliagofie ai e le toatele o tagata, aepeitai o ala sao ia toe moni.
O nei foi aso ua faigata ona iloa le mea moni mai le mea e le moni. Ua faigata tele ona iloa le tagata moni o le Atua mai le tagata ola faafoliga.
I le fuaiupu e sefuluono o le tusi faitau, o loo faamatala mai ai le faailoga e iloa ai le tagata moni o le Atua mai le tagata faafoliga. ‘Tou te iloa i latou i o latou fua.’
O fua e pei ona taua i luga o ni suiga matagofie lea e tatau ona atagia mai i le tagata sa filifili e ulu atu i le faitotoa va apiapi ona o loo iai le ola ma le manuia. O fua lelei e viia ai le Atua.
E faapea foi i latou uma ua filifili e faaaogaina le faitotoa lautele, e lautele foi le ala e tau atu i le malaia.
E faapea foi o latou fua, e fua mai i latou i fua leaga ma o lo latou taunuuga o le taia ma lafoaina i le afi.
O le fesili mo oe Samoa i lenei vaiaso, “O a ni fua o aliali mai i lou soifua? A o le a foi le ala o loo e savali ai? O le tatalo a le Taiala, ia tatou filifili e savavali i le ala va apiapi, aua e ui ina faigata ma tiga, ae o lona taunuuga o le manuia ma le faaeaina.
Maua se vaiaso manuia Samoa!