O lea faatoa fofola i luma o le maota fono a le Palemene le lipoti a le komiti faapitoa a le Palemene sa iloiloina le mataupu o le Pulega Fou o Aukilani aoao poo le Super City.
Ua aliali manino ai i lenei lipoti le finagalo a le faigamalo a le National e faatatau i tagata Maori, Pasefika ma tagata Asia.
E silia ma le 60% i latou sa faaalia finagalo i lenei komiti ma e lagolagoina malosi i le iai o ni nofoa faapitoa mo Maori i le pulega fou.
O le isi 20% latou te ioeina le iai o nofoa faapitoa a Maori, ae tuuina atu le mataupu e pule Maori i se latou filifiliga.
O le isi 15% e leai ni o latou finagalo na faaalia i lea mataupu, sei vagana se vaega toaitiiti e tetee i le iai o nofoa faapitoa mo Maori.
Ou te lagolagoina malosi le iai o ni nofoa faapitoa mo Maori aua o loo iai le feagaiga faapitoa, le Tiriti o Waitangi, o loo aiaia lelei ai aia tatau a Maori i lenei atunuu.
E le gata i lea e taua ia te au le iai o Maori aua e sili atu le malamalama o Maori i manaoga o tagata Pasefika.
Ae pito i sili ona taua le iai o nofoa faapitoa o Maori, aua afai e talia e le faigamalo lea faiga, o le a faapena foi ona faigofie i le Malo ona talia ma amanaia se sao o tagata Pasefika i soo se pulega i totonu o Niu Sila.
Ae paga lea, na muamua lava faalele le faaiuga a le Malo ua latou teena lea faiga, a o lenei e lei maea galuega a le komiti a le Palemene na tuuina i ai le galuega o le sailiili i finagalo o le au Aukilani ma lipoti atu i le Palemene.
Ua mautinoa ai taumafaiga a le Malo o le National e faasese le atunuu i le faapea mai o loo fia iloa finagalo a tagata Aukilani, a o lenei ua faia le latou faaiuga, e tetee ai i le malosi o molimau ma finagalo o tagata Aukilani na faaalia i lea lava mataupu.
O le tetee e le Malo i le iai o Maori i le pulega fou, ua latou tetee ai foi i le auai o tagata Pasefika ma tagata mai itulagi o Asia.
Ua manino ai foi i lea faiga le vaivai ma le faaituau o le taitai o le Malo a le National.
Sa iai lou talitonuga sa tatau ia te ia ona faataua le iai o ni nofoa faapitoa mo Maori, ina ia talia aiaiga o le feagaiga ma Maori, ma avea ai le pulega o Aukilani ma amataga fou mo Niu Sila.
Ou te talitonu e leai se vaai mamao o lenei taitai. Ana vaai mamao ua ia silafia ai o le isi 20 agai i le 50 tausaga o i luma, o le a sili atu le toatele o tagata Maori, Pasefika ma Asia i lo tagata Papalagi, ma o le taimi lenei e tapena lelei ai ma sauniuni mo ia suiga.
Sa tatau lava i le faigamalo ona talia le iai o nofoa faapitoa mo Maori, ma le iai o komiti faapitoa mo tagata Pasefika faapea ma Asia.
O le fautuaga foi lea a le Komisi Suesue a le Malo lea sa muamua iloiloina lea mataupu.
A o tatou faamanatuina i lenei aso Sapati le taua o le tofi o tamā i aiga taitasi, ou te talitonu o se aiga malosi le iai o se tama e vaai mamao ma naunau i se lumanai lelei mo lona aiga, aemaise tupulaga lalovaoa.
E manaomia le tofa mamao ina ia mafai ai ona tatou tapena ma sauniuni tupulaga e tulai e talia o latou tofi i le lumanai ma avea i latou o ni taitai lelei mo a taeao.
E taua le tamā e unai fanau i aoaoga tusa lava poo le a le faigata. E manaomia taitai o le lumanai e malamalama i soo se mataupu.
E taua le tamā e taitaiina lona aiga i tatalo faaleaiga i aso taitasi. E manaomia taitai o le lumanai e faia ana faaiuga ma le matau i le Atua.
E taua le tamā e aoaoina lona aiga ia faia faamalositino, alo ese mai le avamalosi, tapaa ma vailaau faasaina, ma fuatatau mea taumafa e malosi ai.
E manaomia taitai o le lumanai e malosi ma tino lelei, ma e maai le mafaufau.
E taua le tamā e aoaoina fanau i le faaaloalo, alofa, onosai ma le faatuatua.
O mea nei e manaomia ma tua i ai taitai o le lumanai.
Afai e leai se faaaloalo ua le faatauaina tagata. Afai e leai se onosai, ua fiu gofie. Afai e leai se alofa, e faafefete gofie. Afai e leai se faatuatua, ua leai se vaai mamao.
Afai ua leai se vaai mamao, ua maimau le tofi.
Ia manuia galuega o le vaiaso
