O le aso a taeao, Aso Lulu 19 o Mati 2014 o le a fono ai le Kapeneta ma oo atu ai ma le Komesina o leoleo ma le Komesina lagolago o loo faamalolo mai a la galuega mo se taimi lē tumau, mo se finagalo o le Kapeneta e tusa o le taunuuga o suesuega a le Komisi na filifilia e suesueina faaletonu i le falepuipui i Tafaigata.
Ua saunoa le afioga i le Palemia susuga Tuilaepa Lupesoliai Sailele Malielegaoi, ma ia ta‘ua o le oo atu ia te ia o se tusi mai se tamaitai na ia tapa ai se finagalo o le kapeneta lea na mafua ai ona filifilia le komisi e silasila i faaletonu sa laga i le tusi atoa ai ma nisi o faaseā na oo atu ia te ia e faasino lava i le pulega o le falepuipui. Fai mai le alii Palemia o lana silasila i le tusi e fai si matatupa o mataupu sa momoli atu ai, ae sa ia manatu e ao pea ona faia se sailiiliga.
O le Aso Lua ua mavae 11 o Mati 2014 na tuuina atu ni tusi mo le Komesina le afioga Lilomaiava Fou Taioalo ma le Komesina lagolago afioga Sala Seaga Uili Lafaele, ua logoina ai le oo atu i luma o le Kapeneta i le Aso Lulu o le vaiaso nei. Ua faaalia e se molimau o le avanoa lea o le a tali atu ai i laua i ni fesili o le a fesiligia ai e le Palemia ma minisita o le kapeneta, ona o lea sa tuuina atu kopi o le lipoti i minisita uma i le vaiaso ua mavae e faitau ai, ma maua ai so latou silafia loloto i le taunuuga o suesuega na faia e le komisi sa taitaifono ai le Komesina o Sulufaiga le afioga Maiava Iulai Toma.
E silia i le fā masina o faia suesuega a le komisi ma o le taimi umi foi lea sa faamalolo lē tumau ai le Komesina o leoleo ma lana komesina lagolago a o faagasolo ia suesuega. O le aso 2 o Mati na faamuta ai le taimi o lea malologa lē tumau ma e talu mai lea taimi e oo mai i le vaiaso nei o le a iloa ai se faaiuga a le kapeneta i le lipoti a le komisi suesue, o le itu mautinoa e lē toe maua se faamanuiaga tau totogi o i laua sa faamalolo.
O le fā masina sa faamalolo ai sa maua lava o la totogi ma isi faamanuiaga. E lei maua mai se faamatalaga poo le ā le tulaga tonu o loo iai, ina ua muta le taimi o le la faamalologa lē tumau.
I le sailia o se komesina mo le pulega fou o falepuipui i Samoa e pei ona faatuina ai e le Malo lea matagaluega fou, ua faailoa e le Palemia i se feiloaiga ma tusitala e toavalu i latou ua oo atu tusi talosaga mo lea avanoa.
O se pulega fou na faaalia e le Palemia o le a tatau ona foia ai le tele o faaletonu sa tulai mai a o tauaveina e le Matagaluega o leoleo le pulea o falepuipui i le atunuu.
