E tāua pea le sao ma tiute tauave o tamaitai i le lalolagi

E pei ona lausilafia ai le aso faapitoa mo Tamaitai o le lalolagi i le masina lenei o Mati, na faamanatuina ai e tamaitai o loo galulue i le alaleo a le Leitio 4EB le aso faapitoa mo tamaitai o le lalolagi. E 55 atunuu o loo latou faaaogāina le alaleo a le 4EB 981FM, e aofia ai ma Samoa.
O lenei tuufaatasiga, o le agaga maualuga, ia soifua fealofani ma felagolagomai tagata eseese ua soifua nei i Ausetalia, ia aveese le tulaga faailoga atunuu ma le faailogalanu, ae ia mafai ona soifua fiafia, fetufaai finagalo, lagona ma manatu, ma ia maua le fiafia e tagata uma i le faaaloalo ma le felagolagomai.

 
E lē gata i lea ia faatāuaina pea le sao tāua o Tina i totonu o aiga, nuu, ekalesia ma soo se faalapotopotoga. O Tina sa fai sao i ni saunoaga faalaeiau e aofia ai le tamaitai o Anna Voloschenko, sa faasoa i le tulaga o faama‘i eseese ma fesoasoani e mafai ona fai i ai. I le faalapotopotoga a le Ethnic Community Council o le (Chronic Disease Project Officer), o le tamaitai e faiaoga i le Zumba ma sa faatino ai foi ma le Zumba i lena aso, faatasi ma le tamaitai o Vicky Bridgstock sa talanoa i le suamalie o ananafi i Leitio, o loo tuufaatasia e faafofoga ai nai tagata matutua, ua pulapula lagoto le la o le soifua (Silver memories).

 
O le tamaitai Failautusi o le Leitio 4EB aoao o Irene Tavutavu mai le polokalame a Fiti sa nafa ma le tuufatasia o lenei mafutaga i lalo o le pulega a le Fono Faatonu a le 4EB.  O sui o le polokalame Samoa sa auai, o le tofa Mulitalo Tauline Virtue, le faletua o Siaatasi Lio, le faletua o Winnie Niumata, le tamaitai o Petra Virtue, le faletua o Uoiasouma Alalatoa Brown ma le faletua ia Elisapeta Malifa.

Tamaitai o le leitio a le 4EB sa o latou faatinoina ni polokalame o le Aso o Tina o le lalolagi