E le tau toe faailoaina le meaalofa a le Malo Amerika e pine faamau ai le atoaga o le lima sefulu tausaga ua aulia talu ona tutoatasi Samoa mai pulega faakolone, poo pulega a isi Malo i fafo. O le tasi le miliona tala Amerika o lea fesoasoani ua tuusa’o ile fausia o lea falemai, peitai o le sefulu eka o eleele o le Esetete Tausi faafesagai ma le malae vaalele, sa tulai mai ai ni finauga ile va o Alii ma Faipule o Satapuala ma le Malo.
O se finauga na faifai tetele ma iu ina poloka ai e le nuu se vaega o le alatele o le Malo lata ile malae vaalele, ma faatino ai e leoleo se gaioiga na talepe ai le pa maa na loka ai le auala ae tiute leoleo moni vaiaso e vaavaai le saogalemu o le eleele ae sei galulue masini mamafa e sua ma faamama ma agai atu alii ofisa e fua le fanua. O le finauga lava lea ua taunuu i le molia oni matai ma ni taulelea o Satapuala ile faia o se gaioiga solitulafono o le poloka o le auala lea o loo faatalia suesuega a le faamasinoga ua taunuu iai le feteenaiga.
Peitai o le amataga o le vaiaso ua mavae atu nei, na suaina ai le eleele mo le amatalia o le galuega lea na oo atu ai foi ma matai o Satapuala e faailoa ile Malo le latou lagolagoina atoatoa o le galuega. O le tofa Vaili Mimita na fai ma fofoga o le nuu sa ia faaleo lea lagolago. Na tauaaoina foi e matai o le afioaga ni ava usu mo le feiloaiga ma le Malo o se faailoga o le masuiga malie o feteenaiga na iai, ae alo ane Satapuala e opogi lea atina’e taua tele.
O le falemai faaitumalo ua fausia e le tau fesiligia le aoga mo Satapuala ma nuu tuaoi aemaise afioaga e mamao ma le falemai faaitumalo i Leulumoega, tainane siiga mai mai Savaii faapea faalavelave faafuasei e tutupu mai i lea vaega o upolu e aafia ai le soifua o tagata o le a tali manao tele le falemai ua agalelei mai ai le Malo o Amerika i lona faatupega.
O le finauga a Satapuala ma le Malo i eleele o loo soalaupule e se komiti o sui o le Malo ma sui o le nuu, ma e leo toe maua mai se faamatalaga poo le a se tulaga ua oo iai galuega a lea komiti filifilia.
Mo le maota gasegase ua amata ona galuega o se isi lea tautua faale soifua maloloina o le a aoga tele mo le atunuu atoa, aemaise o nai o tatou tagata e aafia i gasegase faigata ae manaomia le siimai i atunuu i fafo, e le taumateina o le a aoga foi iai lea falemai ile taimi e sauniuni ai mo le malaga i fafo e sailiili matagi ai mo ni togafitiga.
