I le tausaga lenei 2013, o le a palota ai le Pulega a Aukilani pe faaaoga se faiga ua faaigoaina o le Sinking Lid i le gagana peretania e faatatau i masini poka i Aukilani. O le a maua ai la le avanoa mo tagata lautele e faailoa ai finagalo e faatatau i masini poka ia i le aai tele.
Poo le a le Sinking Lid?
O le polisi lea o lona faauigaina o le a leai ai nisi laisene fou mo masini poka e toe tuuina ma o le a le mafai ai foi ona toe fetuunai masini poka mai seisi nofoaga i se tasi nofoaga pe afai ua tapunia se kalapu poo se pa sa iai muamua. O lona uiga o le sinking lid ua faia ina ia faaitiitia ai aafiaga o le faaaogaina o masini poka.
Pe faapefea ona aafia komiuniti ona o masini poka?
O aafiaga e oo ina matua aafia ai lava le tagata taalo. O le lusi o tupe i masini ia o lona uiga o le a leai se tupe mo le paaga, fanau ma le aiga foi. Ona oo ai lea i le mativa, gasegase, sauaga i totonu o aiga, soligatulafono ma le fevaevaeai o aiga e pei ona taua i se pepa o faamatalaga ua faalauiloaina e faatatau i lenei mataupu.
Afai ae iai ni faafitauli pele tupe o matua, e ono iai faafitauli e feagai ma tamaiti i aoga ma o le a amata foi ona faaaogaina fualaau faasaina ma le ava malosi.
E le gata i lea o le a oo lava foi ina faanoanoa ma popole ma o el a tele le avanoa e faateteleina ai le taalo tupe. Toeitiiti lava 2.4 miliona e maumau i aso taitasi i masini poka e pei ona taua i tusitusiga ao ia tupe e lusi i totonu o papu ma kalapu i Niu Sila. Mai le silia ma le 40 pasene o le tupe o loo faaalu i masini poka, o tupe ia mai tagata o loo aafia i aafiaga o le taalo fai tupe .O faamaumauga foi o loo taua ai e toeitiiti oo i le 250 miliona sa maumau i masini poka i le tausaga na tea nei.
O le aso 18 la o le masina lenei o Ianuari e tatala ai le avanoa e tuuina atu ai finagalo faaalia i lenei mataupu atoa ai ma le sailia o se fofo o lenei faafitauli.
O le aso 28 o Fepuari e faagata ai finagalo faaalia ma o nisi faamatalaga e mafai ona maua i le upega o fesootaiga i le www.nomorepokies.org.nz poo faalapotopotoga e pei ona galulue i auaunaga e fesoasoani ai i nei faafitauli.
O le vaega a le Pasefika Ola Lelei Service lea o loo galulue faatasi nei ma le Pulega a Aukilani i le faataunuuina o le fuafuaga lea o le Sinking Lid. Taua e le sui o lea faalapotopotpoga, Sunita Nua, e manaomia lava le lagolago a le atunuu ina ia mafai ona sologa lelei nei taumafaiga.
