O le vaiaso nei sa ou feagai ai ma se mataupu a se Ekalesia na faato‘ai atu e tagata o le Ekalesia ma fesiligia poo le ā le latou aiā tatau i luga o le tulafono, ona e faapea o le faifeau ma se tagata e toatasi o se Ekalesia ua laua pulea uma meatotino a le Ekalesia, ae lē tapa se manatu o le Ekalesia, ma lē faia ni fonotaga e logo ai Trustees o le Trust e vaai meatotino a le Ekalesia.
O le fesili, pe iai se pule a le faifeau e tago ai faaaogā tupe a le Ekalesia, o le tali e leai. E tusa poo le faifeau, e faasā i le tulafono ona fai toatasi e se faifeau tonu e alu ai tupe a le Ekalesia, ae lē iloaina ma lei malilie i ai le Ekalesia.
O le isi fesili poo le ā le mea e oo i ai le faifeau pe a ave i le tulafono?
O le tali afai ae faamaonia i luga o le fale faamasino le iloiloina o le tagi a se Ekalesia i ni tupe a le Ekalesia ua faaaogā sese e le faifeau, po ua faaaogā sese talu ai le nofo o le faifeau ma faia tonu o mea e alu ai tupe a le Ekalesia, ae lē faia ni fono e talanoaina muamua ai mea uma e faaaogā ai tupe a le Ekalesia, e falepuipui le faifeau.
E lē ave ane le tofi faifeau, e sefe mai ai le faifeau lena mai i le falepuipui. E mafai foi e le faamasino ona fai se faatonuga e toe totogi tupe a le Ekalesia ua na leiloa ma faalu sese e le faifeau.
O le isi fesili, e faafefea pe afai na malie i ai lē na teutupe e ave tupe i le faifeau e fai ai mea ia na manao ai le faifeau mai tupe a le Ekalesia?
O le tali, e falepuipui foi ma le teutupe pe afai ae faamaonia tuua‘iga i luga i se tagi e ave i le fale faamasino. E lē gata i le falepuipui ae e mafai ona faatonu e le faamasino le teutupe e toe totogi tupe a le Ekalesia ua faaaogā sese e ia ma le faifeau, pe na o ia foi i lona tofi teutupe.
O le Trust Law:
O le upu “trust” i le tatou gagana Samoa o se tagata ua e faamoemoeina e tu i le tulaga sa‘o, tautala ma fai mea sa‘o, poo le ā lava le faafitauli.
O le tulafono Trust Law e puipui ai tupe ma meatotino a Ekalesia, auā e amanaia i le tulafono ia Lotu, ona o le aogā o lotu i olaga o tagata. O le amanaia foi e le tulafono o lotu lea e ala ai ona mafai e lotu ona fai ma totogi mea mo le lelei o le galuega a le Ekalesia ae leai se tax poo ni GST e totogiina i le malo.
O le fesoasoani lea a le malo ia ola Ekalesia ona e amanaia e le malo galuega lelei mo tagata i totonu o Ekalesia.
O le ala foi lea ua faatapulaaina mai ai e le malo, e na o Trustees e tofia aloaia i luga o le tulafono o le Trustees Act, latou te pulea ma umiaina meatotino a Ekalesia.
E faasā i luga o le tulafono ona tago se faifeau i tupe a le Ekalesia. E faasā i le tulafono ona aveese faifeau se fanua poo se fale, e faatau i ni tupe a le Ekalesia, e tusa pe faapea ua foai i se maliliega o nisi o le Ekalesia.
O le tofiaina o Trustees:
E lē faia le faasamoa i tofiga o tagata e tauaveina tiute e puipui ai meatotino a le Ekalesia.
O loo faataupulaa lava i le tulafono auala uia ma fonotaga e tatau ona faia, e palotaina ai tagata ua faamoemoeina e faia tofi trustees.
O tofi trustees o tofi tāua tele e lē tatau ona tofia i se isi e lē faamaoni, ma e lē tatau foi ona tofia i se tagata e lē iloa le tulafono e tatau ona uia i le faiga o lona tiute e umia meatotino a le ekalesia ma faaaogā tatau.
A lē faia galuega a Trustees i luga o le tulafono e falepuipui foi trustees e pei o le mea e oo i ai le faifeau, lea e ta‘ua i luga. Manatua e faaleaga e le toatasi, ae suffer uma tagata o le lotu, ma faaletonu ai le faaauauina o le lotu, mo tupulaga fai a‘e. E sili le puipuia, i lo le togafitia.
