O le sao o tina o Samoa i le atinae o le atunuu i le atoa ai o le limasefulu tausaga talu ona maua lo tatou malo tutoatasi ua tuufaatasia nei i se polokalame tau ata faasalalau i luga o televise poo se documentary o loo taulamua ai le faalapotopotoga o tina o le Pasefika ma Asia lea e ta‘ua o le PPSEAWA poo le Pan Pacific and South East Asia Women’s Association.
Faaalia e le Peresetene o le faalapotopotoga le susuga Papalii Dr Viopapa Annandale Atherton, o le tele o le sao o tina o Samoa e lē o mafai ona iloa o le avanoa lea e faalauiloa ai i lea taumafaiga ina ia faasalalau atu ai mo le silafia e tagata aemaise lava le sao o tina e seāseā ona aliali mai i luma ona o tulaga o loo ola ma soifua ai i totonu o nuu ma afioaga.
Faaalia e Papalii Dr Viopapa o se tasi o tulaga maualuga ua ausia e tina o atinae tau pisinisi e pei o taumafaiga a le faalapotopotoga o tina faipisinisi o Samoa, le Samoa Women in Business i le fesoasoani i aiga mo tupemaua e ala i le gaosia o oloa e pei o le suauu e maua mai le popo lea e faaigoaina o le Virgin Oil o loo faatau i fafo.
E tele isi atinae faapea a tina ae o le ata o loo pueina nei o le a iloa uma ai ia taumafaiga lelei uma.
O se tasi vaega sa ia faailoa o le tatau ona faamalosia le leo o tina i totonu o pulega o nuu ma afioaga, o aiga ma totonu o upufai o le Malo e pei o le unaia o le siitia o le numela o tina ma tamaitai e avea ma faipule o le Palemene o le atunuu.
O le amataga o le tausaga fou o loo fuafua e tatau ona mae‘a ai ona pue ma tuufaatasia lea polokalame tau televise o loo galulue ai nisi o alo o le atunuu ua iai le agavaa ma le poto masani i le faia o lea ituaiga o galuega ma tautua.
