O Aukuso na amata ai ona lapataia le atunuu e le pulega o le suavai ina ia nofo sauniuni o le a oo i taimi o mugala e faaitiitia ai timuga ma faaletonu ai le suavai maua mo le faaaogaina i aso taitasi. Talu mai lea masina e oo mai ia Tesema 2012 o loo faamalosia pea lapataiga ma fautuaga a le pulega o le suavai, ona o loo faasoasoa pea lea vaega manaomia o le soifuaga o tagata.
Faaalia e le puleaga, a o agai atu le atunuu i le tau faaiuiuga o lenei tausaga, o loo tūmau pea ona iai Samoa i aafiaga o le mugala e pei ona sa iai nai masina ua tuanai atu.
“O loo maitauina pea lava le tulaga faalētonu i le tele o vaitafe ma vaipuna e pei ona faalagolago i ai le Pulega o le Suavai mo le tapueina mai o le suavai auā le fofoga taumafa o le mamalu o le atunuu”, o se faamatalaga mai le pulega o le suavai.
“O lea o loo tumau ai pea le talosaga a le Pulega o le Suavai i le mamalu lautele o le atunuu, ina ia lava le onosai i le tau faasoasoaina atu o le suavai i nisi o vaega o le atunuu i le taimi nei. moni lava o loo maua nai timu, ae lē o mafai ai ona gafatia ai le toe faatumuina o faatanoa o loo pueina ai le suavai, ona o le tele o le manaomia.
O le mafuaaga lea o loo taumafai ai le Pulega e fetuunai taimi e maua ai e lea nuu ma lea afioaga le suavai ina ia mautinoa o loo maua le suavai i se taimi o le aso.
O loo faagasolo pea le polokalame o le faasoasoaina o le suavai i taimi faatulagaina i nisi o vaega o le atunuu aemaise nofoaga maualuluga e pei o Aleisa, Vailele-tai/uta, Fagalii-tai/uta, Vaivase-uta ma afioaga uma e amata atu i Motootua e agai atu i Tiapapata ma Tiavi ma vaega o loo fafagaina atu i Fuluasou.
O taimi faatulagaina mo le faasoasoaina o le suavai faatasi ai ma nofoaga o le a aafia o loo faasalalauina faalauaitele e le Pulega i vaega eseese o fesootaiga.
O loo tumau pea foi lapataiga a le Pulega o le Suavai, ina ia faaaoga tatau le suavai, aua le faamaimauina ma faaalu le aogā. E iai lava vaega tāua e tatau ai ma talafeagai le faaaogaina o le suavai i lenei vaitau o le utiuti o le suavai e pei o le fofoga taumafa ma le kukaina o mea taumafa.
Ia faaitiitia le suavai e soona faaalu i taelega, ia faaaoga ni paelo e tuu ai le suavai e fufulu ai ipu ma fai ai tagamea. Aua le faaaogaina le suavai o loo maua mai le paipa e fui ai togalaau, auala ma malae taalo, ae faaaogā ni vai e aumai mai puna ma vai o le a lafoai. Ia faaitiitia foi le faatumuina o nisi o vai taele (swimming pool), o le fufuluina o taavale aemaise o vaai‘a ma le tineia o afi ma isi.
Ua fautuaina le atunuu ina ia faafesootai pea le Pulega i soo se taimi vave e maitauina ai soo se faafitauli i le suavai. “Ia lipoti mai ni paipa papa ma paipa liki ina ia tuuina vave atu i ai se fesoasoani e faaleleia ai ina ia faasaoina ai le alu lē aogā o le suavai.
O le tasi lea o vaega na faaalia e le minisita faaolioli a le Itu Agai mo atinae e pei o le suavai, le afioga Toesulusulu Cedric Schuster, i se talanoaga ma tusitala.
Na ia faaalia ua iai se lipoti ua faailoa ai e tusa ma le 60 pasene o le suavai o loo alu maumau ona o pa ma liki ae e lē o mafai ona oo i ai le galuega e faaleleia.
Faaalia foi e le minisita faaolioli o le Itu Agai, ua mafua ona pepē vaitafe i nisi o nofoaga o loo pue ai le suavai ona o loo totō ai laau o le tamaligi.
Fai mai Toesulusulu pe ana totō ai nisi ituaiga o laau e uumi o latou a‘a e mafai ona loloto le ola ma faatumauina ai pea le sua o vaitafe semanu e lē tulai mai le faaletonu i le suavai ona ua mamate vaitafe.
E toatele foi aiga ua nofoia autafa o nofoaga o loo pue ai le suavai ma nisi ua latou tatā laau mo faatoaga ma ua mafua ai foi ona mamate vaitafe.
