Ua amata nei se galuega tele o le a faamautu ai le maualuga e tatau ona oo i ai nisi o tomai ua toatele le atunuu ua faapea ona aoaoina ai ma ua galulue ai foi.
O lenei galuega ua faamalosia ai se fua faataatia e tatau ona oo i ai le maualuga o le faatinoga o auaunaga eseese i le atunuu, ma o i latou lava i totonu o tomai eseese nei ua galulue nei ma le Pulega o faailoga faaleaoaoga i Samoa le Samoa Qualifications Authority (SQA).
O auaunaga nei ua faatautaia i ai lenei galuega tele ua aofia ai galuega faainisinia taavale, o galuega tau i masini eseese, galuega o le faieletise, o i latou e feagai ma le faaleleia o masini, o galuega faapalama, o le kamuta ma le uelo, o galuega o le fai pusaaisa ma le fai ea malulu.
O loo faatautaia lenei galuega i lalo o se polokalame e faaigoaina o le TVET ma o se tasi lenei o polokalame i lalo o atina‘e faaleaoaoga ua galulue soosoo tau‘au ai le Malo o Samoa ma le malo o Ausetalia (Samoa-Australia Partnership for Development).
Ua faapea foi ona iai ma le sao o le Matagaluega o Pisinisi, Atina‘e ma Leipa faapea ai isi paaga a le polokalame o le TVET.
Ua faafaigluega faavaitaimi e le SQA se alii ua iai le tomai faapitoa faainisinia o le kamupani e ta‘ua o le Framework Solutions mai i Niu Sila e ofo atu lona tomai faainisinia i le taumafai ai e faamautu le maualuga e tatau ona oo i ai auauanga taitasi lenei, faatusatusa i le maualuga ua iai le fua faatatau a Niu Sila i nei tautua eseese.
O le galuega lenei ua vaavaai ai i le tomai ua maua e i latou i ia tautua, ma le faatinoga o nei auaunaga i totonu o le falefaigaluega. Ua tele lava tomai poo tautua ua faatino ai lea ituaiga galuega ina ia mautinoa e faamalosia le maualuga o le lelei o auaunaga i totonu o le atunuu ma o i latou lava o loo i totonu o tautua nei ua galulue uma nei i le faamautu ai o le maualuga o nei tautua.
