O le tausaga nei e amata faataitai ai le faatauina muamua (pre-pay) o pepa o le Siva aloaia o le Tutoatasi i Sini (Independence Ball), ina ia faigofie ai ona mataituina valaaulia ma i latou na muamua totogi a latou pepa ae taunuu atu ua alala mai ai nisi faatoa faatau i le faitotoa. O le tausaga talu ai na vaaia ai le faatumulia o le faamoemoe tuufaatasi a le Fono Aoao faapea Lau Samoa na faia i Bankstown ma na tulai mai ai loa lenei tulaga. O le toe pa‘ū i lalo o tau o pepa i le limasefulu tala e aofia ai le ava malosi ma le taumafataga (3 course meal) faapea faafiafiaga ma le faaili, na mafua ai le faatumulia tele o le siva o le 2013.
Ua toe foi nei le tau o le pepa masani i le $80 ma ua faatapulaa nei le fuainumera i le faselau pepa mo le tausaga nei e vaelua tutusa ai le Fono Aoao ma le Lau Samoa i le faatauina. Ua talitonu nisi e lē misia lenei Siva i tausaga taitasi ma ua alagatatau foi lea suiga auā na vaaia i le tausaga talu ai le alolofa i nai nisi o tamalii ma o latou faletua ua loa ona totogi pepa ae peitai na lē maua o latou nofoaga sa tatau na alalala ai talu le toatele o i latou na faatoa totogi i le faitotoa. Saunoa se tasi o le komiti o le lelei foi o lea suiga ina ia mapu ma filemu ai tapenaga i le lua vaiaso a o loma le faamoemoe ma iloa lelei fuainumera e tuu atu i le maota o loo gasese ai taumafa ma laulau taitasi ia leai se itu e faaletonu.
Afai e 400 tagata e totogi ma tuuina atu ai a latou pepa ulufale ta‘i $80, e saunia foi na o le 400 taumafataga mo laulau a i latou nei e to‘a faselau. O se auala foi e vavao ai nisi e taunuu atu ma ofu faigaluega masani ma ofuvae vaepupuu ma mitiafu e lē matagofie i le vaai a o laei lelei uma le aofia mo le faamanatuina o le tutoatasi. “O le mau lea e toe fia faamanatu atu e ese le ‘Independence Ball’ ese le siva Samoa (social) foi lea e fai i faaiuga o vaiaso,” o se saunoaga lea a se tasi sui o le Komiti.
