Ua mae‘a ona pue ma tuufaatasia nei le vaega lona 2 o le ata ‘Toe foi le tama Savaii’. O se ata o loo faatali i ai le afe ma afe o tagata Samoa e pei ona molimauina e le pule o le kamupani. Na ia ta‘ua le anoanoai o imeli, telefoni, ma txt a le atunuu mai vaega eseese o le lalolagi o loo fesili i le vaega lona 2 o lenei ata ua matuā logologoa ona tala. O le molimau a le toatele o ē na matamata i le vaega muamua o lenei ata, le Toe foi le tama Savaii – Part 1 e matuā matagofie tele le faatinoga o le tala, tele foi aoaoga tāua, aemaise o le olaga Samoa lea o loo aafia ai le toatele o tagata.
O lenei ata na tusia e Vili Ieru i le tausaga e 2007, lea na fatu ai ma le pese o loo faaigoa ai le ata, Toe foi le tama Savaii, ma usuina e Mautoatasi. O loo galulue ai ma Tupai Faasalafa, o i laua uma mai le afioaga o Sagone. O le faaiuga o le masina nei o Mati o le a faatau atu ai i tua le Vaega 2 o lenei ata. O loo fuafua foi e tatalaina i Sini Ausetalia faapea Niu Sila. Ta‘ua e Vili, e oo lava i le Fofoga Fetalai o le Maota, na valaau ane lava ia te ia mo le fia maua o sana kopi o le ata, Toe foi le tama Savaii – Part 1, lea na oo ai lava Vili i le ofisa o le Fofoga Fetalai e tauaao i ai lana kopi o le ata, e pei ona iai le la ata o loo pueina faatasi i le ofisa o le Fofoga Fetalai. O le aso foi lea sa tuuina atu ai le ata lava lenei i le taitai o le Itu Agai, Afioga Palusalue Faapo II ma sa talisapaia ma le agaga faafetai.
O le fesili tele la lea o loo tulituliloa mai pea e le mamalu o le atunuu i le taimi nei, poo afea e sau ai i tua le Part 2. O le fautuaga a Vili, ia faatau sau ata e iloa ai poo fea ua fai i ai le tevaaga a le tama Savaii, ae poo faapefea mai foi lona toalua. O se vaaiga matautia i le aiga lea. O le a toe tagai ai foi ia Pili i le vaega lea poo le ā lana mea lea e fai i le Vaega 2 o le ata. E 3 vaega o lenei ata e pei ona ta‘ua i se faamatalaga mai ia Vili. O le fautuaga o loo augani mai ai sia foi tamalii i le tatou atunuu, ia faaali lau lagolago i nai a latou foi taumafaiga, e ala i le faatau lelei o sau ata, ae aua e te fiafia e faatalitali e faanoi mai le ata a le isi au uo poo sou tauaiga e te matamata fua ai. E fai lava foi sina taugata o le faatupeina o nei ata.
Ua agai atu nei le ata i Thailand e press mai ai ona faatau atu loa lea i tua i le iuga o le masina nei. E maua nisi faamatalaga atili pe a valaau sa‘o le susuga Vili Ieru i le 0211427234.
Faamatalaga na tuuina mai
