“Sa tatau ona tou faaaloalo i le tagata ua maliu”
O se tagata ua maliu e tatau ona faaaloalo i ai e pei ona pele i tagata o loo soifua i latou, i le faia lelei o nofoaga e lagomau ai, aemaise o le teuteu ma faamamā. O se tu lea faakerisiano e pei foi ona mamalu tele i Samoa.
Peitai e lē o le tulaga lea na tulai mai i se aiga na faataotolia lo latou tina matua i se gasegase, ae laumanuia ai ua mafua ona gasegase ona o se tasi o lona aiga ua maliu. O le mafuaaga lea na agai ai loa nisi o lana fanau ma talepe le tuugamau ae susunu lē ua maliu.
Na ioe uma i latou i moliaga o le faaleagaina o le tuugamau; e fitu tausaga le maualuga o le faasalaga faafalepuipui, ma le moliaga o le satia o le tino o le tagata ua maliu; e lua tausaga le faasalaga maualuga i le falepuipui. O le toavalu o tagata o le aiga na molia o loo aofia ai ni tamaitai poo ni tina se toatolu.
O le Aso Faraile na tea nei na lauina ai le faasalaga a le faamasinoga mo i latou. O le toalima faatoa tulai lea i se solitulafono ma ua faatonuina e totogi e le tagata e toatasi le $500 tala faaopoopo i ai le tai limasefulu tala mo le faamasinoga ma le itu a leoleo ona $600 selau lea o le latou salatupe.
O le isi toatolu e iai nisi o moliaga sa tulai muamua ai i le faamasinoga, ua faasalaina i le $700 tala e totogi e le tagata e toatasi. O le vaiaso atoa lenei e tatau ona totogi uma ai a latou sala tupe, ma a oo atu i le ta o le 4pm o le Aso Faraile o le vaiaso nei e lei totogia, o le a ave loa e nofosala i le falepuipui mo le umi e ono masina.
O i latou nei e aofia ai, Uofu Atonio, Fetuli Saimoni, Talalemoe Saimoni, Vesi Pule, Asema Siale, Vito Alofaita, Simoa Saimoni, ma Solomona Auloa.
O i latou uma foi nei e mai le afioaga o Tuanai. Na tatalo le tina na tagi i leoleo, o le tuafafine lea o lē ua maliu na faaleaga lona tuugamau ma lona tino i le soligatulafono, e toe ave i tua le mataupu ona ua mae‘a ona faalelei lo latou va ma nisi lava o lo latou aiga na faia le gaioiga.
O se itu tāua lea sa silasila i ai le faamasinoga i le iloiloina o lana faaiuga. E pei ona silafia o le solitulafono lenei o se taimi muamua lea ua tulai mai ai ma oo i le faamasinoga maualuga. Na faaaogā e i latou na molia pa‘u taavale, o ogalaau ma penisini faapea lapisi e susunu ai le tino maliu i totonu lava o le tuugamau.
O lenei gaioiga na faia sa aunoa ma se isi o le aiga o lē ua maliu na tali i ai, ae sa taatia lava i leoleo mo le faia o suesuega ma tuuina atu ai i le faamasinoga.
